Mysyr shólinen Vızantııa dáýirine jatatyn qala tabyldy
ASTANA. KAZINFORM — Mysyrdyń batys shólindegi Dahla oazısi aýmaǵynda arheologter Vızantııa dáýirine jatatyn qalany tapty. Qazba jumystary barysynda IV ǵasyrdaǵy turǵyn kvartaldar, dinı ǵımarat, eki kúzet munarasy, qorǵanys qabyrǵalary jáne qabyldaý zaldary men kúmbezdi shatyrlary bar turǵyn úıler anyqtaldy, dep jazady BelTA.
Mysyrdyń joǵary kóne eskertkishter keńesiniń bas hatshysy Hısham ál-Leıtıniń aıtýynsha, tabylǵan kvartaldarda soltústikten ońtústikke sozylyp, shyǵystan batysqa qaraı qıylysatyn kósheler bolǵan. Olar ashyq alańdar men qoǵamdyq keńistikterdi qalyptastyrǵan. Qalanyń joǵary bóliginde IV ǵasyrdyń ortasyna jatatyn dinı ǵımarat ornalasqan. Sondaı-aq eldi mekenniń shetki bóligin kúzetken eki munaranyń qaldyqtary men qalyń qorǵanys qabyrǵalary bar bekinis qurylystary tabylǵan.
Tabylǵan zattardyń arasynda nan pisiretin peshter, as úı ydystary, astyq untaqtaýǵa arnalǵan tas quraldar, Rım ımperatory II Konstantsııdiń bıligi kezindegi qola jáne altyn tıyndar bar. Arheologtar sonymen qatar saýda jazbalaryn qosa alǵanda, shamamen jazýy bar 200 qysh synyqtaryn tapty. IV ǵasyrdyń ekinshi jartysyna jatatyn shirkeýdegi dinı qyzmetkerdiń kómekshisi Tısýdyń úıi erekshe qyzyǵýshylyq týdyrady. Ol qala bazılıkasy salynǵanǵa deıin úı shirkeýi retinde qyzmet etken dep esepteledi.
Mysyrdyń Týrızm jáne kóne eskertkishter mınıstrligi bul jańalyq Mysyr Vızantııa ımperııasy kezeńinde bolǵan dáýirdegi kúndelikti ómir, qalalardyń damýy men ekonomıkalyq qyzmeti týraly tyń málimetter beretinin málimdedi.
Sonymen qatar Marına-el-Alameın arheologııalyq kesheninen taǵy 18 kóne qabir tabylyp, bul aýmaqtaǵy anyqtalǵan qabirlerdiń jalpy sany 48-ge jetti. Qazba kezinde tereńdigi shamamen 8 metr bolatyn jartasqa qashalǵan 11 qabir men áktastan salynǵan 7 jerústi qabiri anyqtaldy. Arheologtar qysh qumyralar, amforalar, shamdar, tabaqtar, qurbandyq ústelderi jáne áktastan jasalǵan tostaǵandardy tapty.
Eń qundy oljalardyń qatarynda uzyndyǵy 2,5 metr bolatyn granıt sarkofag pen onyń ishindegi adam súıegi, sondaı-aq gıpsten jasalǵan sfınks músini bar.
Marına-el-Alameın arheologııalyq eskertkishi 1986 jyly tabylǵan. Zertteýshilerdiń pikirinshe, bul jer Jerorta teńizi jaǵalaýyndaǵy II ǵasyrda negizi qalanyp, IV ǵasyrǵa deıin gúldengen ejelgi grek-rımdik Levkaspıs port qalasynyń orny bolýy múmkin.
Aıta keteıik, jyl basynda Qytaı men Ózbekstan arheologteri Kýva qalashyǵy qabyrǵalarynyń qaldyqtaryn tapty.
