Mysyr shól dalada jańa qala salýdy josparlap otyr

ASTANA. KAZINFORM — Mysyrda shól dalada Nil ózeninen sý alatyn jańa qala boı kóteredi, dep habarlaıdy AZERTADJ.

Mysyr premer-mınıstri Mýstafa Madbýlı elde jańa qala salý jospary týraly aıtyp berdi. Bul qala shól dalada ornalasyp, oǵan Nil ózeniniń jyldyq kvotasynyń shamamen 7 paıyzy baǵyttalatyn bolady.

Sý tapshylyǵy problemasyna tap bolyp otyrǵan Mysyr bıligi bul jobanyń memlekettik aktıvterdiń qunyn arttyrýǵa jáne jer baǵasyn kóterýge kómektesetinine úmittenip otyr. Premer-mınıstr mundaı maqsatqa jetý úshin «dástúrli emes, ınnovatsııalyq ıdeıalar» qoldanylatynyn atap ótti.

Reuters agenttigi habarlaǵandaı, Kaır qalasynyń ortalyǵynan 42 shaqyrym batysta ornalasatyn 6,8 mln sharshy metrlik Djırıan qalasyna kún saıyn Nilden shamamen 10 mıllıon tekshe metr sý jetkiziledi. Bul sý 2,28 mln akr aýmaqty qamtıtyn New Delta jobasyn sýmen qamtamasyz etýge baǵyttalady.

Mýstafa Madbýlıdiń aıtýynsha, bul joba Mysyr bıligine sý men elektr energııasynyń tapshylyǵy, sondaı-aq tereńdep kele jatqan ekonomıkalyq daǵdarysqa qarsy kúreste kómektesip, memlekettik aktıvterdiń qunyn arttyrady ári jer baǵasyn ósiredi.

Joba aıasynda turǵyn úıler, kommertsııalyq aımaqtar, aılaq pen erkin ekonomıkalyq aımaq salý josparlanyp otyr.

Osydan buryn Mysyrda perǵaýyn murageriniń qabiri tabylǵanyn habarladyq.