Mysyr prezıdenti Gaza sektoryndaǵy beıbit turǵyndardy Izraıldegi shólge kóshirýdi usyndy

Mysyr prezıdenti Abdel Fattah ál-Sısıdiń shamalaýynsha, Izraıl men HAMAS arasyndaǵy qazirgi qaqtyǵys kezinde Gaza sektorynan ketýge májbúr bolǵan palestınalyq beıbit turǵyndardy Izraıldiń shóldi aımaqtaryna ornalastyrýǵa bolady. Kazinform agenttigi bul týraly CNN-ge silteme jasap habarlaıdy.

As-Sısı men Germanııa kantsleri Olaf Sholts sársenbi kúni Kaırde birlesken baspasóz máslıhatyn ótkizdi.

«Men Izraılge HAMAS jáne basqa da ıslamshyl jasaqtarmen qaqtyǵys kezinde palestınalyq beıbit turǵyndardy Izraıldegi Nakab shóline kóshirýdi usynar edim», - dedi prezıdent As-Sısı baspasóz máslıhatynda.

Nakabty Negev shóli dep te ataıdy.

Ol Mysyr qazirgi ýaqytta 8,5 mln bosqyndy qabyldap otyrǵanyn jáne odan da kóbin ornalastyra almaıtynyn basa aıtyp, sonymen birge Mysyrǵa palestınalyqtardyń kóp kelýine baılanysty yqtımal qaýipsizdik qaýipterine alańdaýshylyǵyn bildirdi.

«Eger biz palestınalyqtardyń shekaradan kóptep ótýine ruqsat etsek, Izraılge qarsy lańkestik operatsııalar oryn alýy jáne Izraıl oǵan jaýap qaıtarýy múmkin», - dedi As-Sısı.

Mysyr basshysy beıbit turǵyndardyń óltirilýin aıyptap, arab memleketteri arasynda Palestına isiniń mańyzdylyǵyn atap ótti.

"Gaza sektoryndaǵy Ál-Ahlı aýrýhanasynda júzdegen adamnyń ómirin qıǵan jarylystan keıin prezıdent Abdel Fattah As-Sısı búkil Mysyrda úsh táýlikti aza tutý kúni dep jarııalady" delingen Mysyr prezıdentiniń keńsesi sársenbi kúni taratqan málimdemede.

Seısenbi kúni tańerteń Iordanııa koroli Abdalla II palestınalyqtardyń Iordanııa men Mysyrǵa kóshýi «qyzyl syzyq» ekenin eskertip, Iordanııada da, Mysyrda da jańa bosqyndar bolmaıtynyn basa aıtty.