Mysyr palestınalyqtardy shyǵarýdyń «ádiletsizdik aktisine» qatyspaıdy — as-Sısı

ASTANA. KAZINFORM — Kaır prezıdent Tramppen jumys isteýge daıyn, biraq onyń Palestına máselesine qatysty ustanymy ymyraǵa kelmeıdi, dep habarlaıdy Kazinform menshikti tilshisi.

Mysyr prezıdenti Ábdel-Fattah as-Sısı AQSh prezıdenti Donald Tramp palestınalyqtardy aýmaqtan Mysyr men Iordanııaǵa kóshirý josparyn usynǵannan keıin Gaza turǵyndaryn májbúrlep kóshirý «biz qatysa almaıtyn ádiletsizdik» ekenin málimdedi. 

— Mysyrdyń Palestına máselesine qatysty ózgermeıtin tarıhı ustanymy… eshqashan ymyraǵa kelmeıdi. Palestınalyqtardy elden shyǵarý týraly áńgimege keletin bolsaq, Mysyrdyń ulttyq qaýipsizdigine áser etýine baılanysty buǵan eshqashan jol berýge nemese ruqsat berýge bolmaıdy, — dedi as-Sısı Kaırge saparmen kelgen Kenııa prezıdenti Ýılıam Rýtomen ótken baspasóz máslıhatynda.

As-Sısıdiń málimdeýinshe, Mysyr «Palestına memleketin qurýdy jáne onyń múmkindikterin, ásirese halqy men aýmaǵyn saqtaýdy» qoldaıdy. Ol Mysyr eki memleketti qurý týraly sheshim negizinde Izraıl men Palestına arasyndaǵy beıbitshilikke qol jetkizý úshin Tramppen birge jumys isteıtinin qosyp ótti.

— Biz prezıdent Tramp Taıaý Shyǵysta ádil jáne uzaq beıbitshilik ornatý sııaqty kópten kútken maqsatqa qol jetkize alady dep senemiz, — dedi Mysyr basshysy.

Buǵan deıin Izraıl palestınalyqtardyń Gaza sektorynyń soltústigine jappaı oralýyna ruqsat bergenin jazǵan edik.