Mysyr mýmııasynan Gomerdiń «Ilıadasy» tabyldy
ASTANA. KAZINFORM — Ispanııa men Mysyrdyń birlesken arheologııalyq mıssııasy Oksırınh aýmaǵynda altyn japsyrmalarmen jáne papırýstarmen bezendirilgen mýmııalardan turatyn jerleý keshenin tapty. Sol papırýstardyń birinde Ilıada poemasynan úzindi bar, dep jazdy Euronews agenttigi.
Qazba jumystaryn Barselona ýnıversıteti men Ejelgi Taıaý Shyǵys ınstıtýty júrgizgen. Zertteý nysany — Kaırden shamamen 190 shaqyrym ońtústikte ornalasqan ejelgi Oksırınh qalasy.
Arheologtar erekshe oljaǵa tap boldy: mýmııalardyń biriniń ishinen papırýsqa jazylǵan mátin tabylǵan. Onda Gomerǵa telinetin «Ilıada» poemasynyń ekinshi jyrynan úzindi saqtalǵan.
Bul olja «65-qabir» dep atalatyn jer asty qorymynan tabylǵan. Ejelgi zamanda tonalǵanyna qaramastan, onda jerleý rásimine qatysty kóptegen qundy zattar jaqsy saqtalǵan.
Ekspedıtsııa jetekshileri — Maıte Maskort jáne Ester Pons Mellado — geometrııalyq órnektermen bezendirilgen, túsi áli de saqtalǵan mýmııa oramalaryn, túrli túske boıalǵan aǵash sarkofagtardy jáne metall buıymdardy tirkegen. Olardyń qatarynda juqa altyn japyraqshalar men mys bóligi bar. Bul zattar marqumdy o dúnıege shyǵaryp salýǵa arnalǵan ejelgi grek-rımdik jerleý dástúriniń bir bóligi bolǵan.
Eń erekshe jańalyq — mýmııa ishinen tabylǵan papırýs. Onda «Kemeler tizimi» dep atalatyn bólim bar, bul — Troıaǵa attanǵan grek áskerleriniń tizimi berilgen poemanyń mańyzdy bóligi.
Mysyrdyń týrızm jáne kóne jádigerler mınıstri Sherıf Fathı bul jańalyq Al-Mınıa óńiriniń baı arheologııalyq tarıhyn tolyqtyra túsetinin aıtty. Al Ejelgi eskertkishter jónindegi joǵarǵy keńestiń bas hatshysy Hesham Al-Leızı bul oryn grek-rım kezeńindegi jerleý dástúrleri týraly jańa málimet beretinin atap ótti.
Qazbaǵa qatysqan Kaır ýnıversıteti professory Hasan Amerdiń aıtýynsha, bul qorym ejelgi mysyrlyq jerleý dástúrleriniń ellındik jáne rımdik yqpalmen qalaı ushtasqanyn kórsetedi.
Bul jańalyq Oksırınhtyń Ptolemeıler dáýiri men Rım ımperııasy kezeńindegi eń mańyzdy arheologııalyq jáne jazba mura ortalyqtarynyń biri bolǵanyn taǵy da dáleldeıdi.
Eske sala keteıik, buǵan deıin Ystyqkóldiń túbinen Atlantıdaǵa uqsas kóne qala tabylǵan edi.