Mysyr men Iordanııa palestınalyqtardy qonystandyrýǵa qarsy
ASTANA. KAZINFORM — Kaır men Amman táýelsiz Palestına memleketin qurý Taıaý Shyǵystaǵy beıbitshilik pen turaqtylyqtyń birden-bir kepili dep sanaıdy, dep jazady Kazinform menshikti tilshisi.
Mysyr prezıdenti Ábdel Fattah as-Sısı men Iordanııa koroli Abdalla II seısenbi kúni telefon arqyly sóılesip, aımaqtaǵy oqıǵalardy talqylady. Taraptar Gaza sektoryndaǵy atysty toqtatý kelisiminiń oryndalýyn, onyń ishinde kepilge alynǵandar men tutqyndardy aıyrbastaý, sondaı-aq Palestına anklavy turǵyndarynyń gýmanıtarlyq kómekke qol jetkizýin qamtamasyz etý máselelerin talqylady, dep habarlady Mysyr ákimshiligi.
Eki lıder de «Taıaý Shyǵysta turaqty beıbitshilik ornatýǵa shaqyratyn birtutas arab ustanymyn saqtaý qajettigin» atap ótti.
Áńgime AQSh prezıdenti Donald Tramptyń Mysyr men Iordanııaǵa palestınalyqtardy ornalastyrý týraly usynysyna qatysty keń pikirtalas kezinde ótti. Ony Kaır de, Amman da úzildi-kesildi qabyldamady.
Seısenbi kúni Tramp tańǵalarlyq málimdeme jasap, AQSh-tyń soǵystan zardap shekken Gaza sektoryn baqylaýǵa alatynyn, palestınalyqtardy basqa jerge qonystandyrǵannan keıin ony ekonomıkalyq turǵydan damytatynyn aıtty.
Korol Abdalla men prezıdent as-Sısı Gaza sektoryndaǵy soǵysty toqtatý kelisimin tolyq oryndaý qajettigin atap ótip, anklavty tez arada qalpyna keltirý qajettigin aıtty.
Olar 1967 jylǵy shekarada astanasy Shyǵys Ierýsalım bolatyn táýelsiz Palestına memleketin qurýǵa shaqyryp, eki memleketti bir sheshimge negizdelgen turaqty beıbitshilik qurýǵa qýattady.
Taraptar Sırııa men Lıvandaǵy jaǵdaıdy da talqylady.
Korol Abdalla II 11 aqpanda Vashıngtonǵa baryp, Tramppen kezdesýdi josparlap otyr.
Mysyr men Iordanııa basshylarynyń telefon arqyly sóılesýi Mysyr, Iordanııa, Saýd Arabııasy, BAÁ jáne Qatar dıplomattarynyń AQSh Memlekettik departamentiniń Taıaý Shyǵys isteri bıýrosynyń joǵary laýazymdy qyzmetkeri Tımotı Lenderkıngpen kezdesýinen keıin boldy. Kezdesý AQSh ákimshiliginiń joǵary laýazymdy sheneýnikterimen, Ulttyq qaýipsizdik keńesimen jáne Memlekettik departamentpen ótken birqatar talqylaýdyń bóligi boldy. Onda arab elderi óz ustanymdaryn jetkizýge jáne ony Tramp ákimshiligi ustanymdarymen úılestirýge tyrysty.
Sońǵy kúnderi arab elderi palestınalyqtardy Gaza sektorynan kúshtep kóshirý ıdeıasyna qarsy shyǵyp, AQSh-ty bul máselede teń pozıtsııa ustanýǵa shaqyrdy.
Osyǵan deıin Saýd Arabııasy Gazadan palestınalyqtardy yǵystyrý áreketinen bas tartatynyn habarlaǵan edik.