Mysyr quramasy álem chempıonatynyń fınaldyq kezeńine joldama aldy
ASTANA. KAZINFORM - Fýtboldan 2026 jylǵy álem chempıonaty fınaldyq kezeńine Afrıka qurlyǵynan Mysyr quramasy joldama aldy.
Bul eldiń fýtbolshylary A tobynda synǵa tústi. Olar toǵyzynshy týrda syrt alańda Djıbýtıdi 3:0 esebimen jeńip, álem chempıonaty fınaldyq kezeńine joldamaǵa bir týr buryn ıe boldy. Sondaı-aq Mohammed Salah bastaǵan oıynshylar óz tobynda Býrkına-Faso, Serra-Leone, Gvıneıa-Bısaý, Efıopııa, Djıbýtı quramalaryn artta qaldyrdy.
Mysyr quramasy qazirge deıin jarystyń atalǵan satysynda úsh márte baq synady. Alǵash ret 1934 jyly qatyssa, odan keıin 1990, 2018 jyldary toptyq kezeńde oınady.
Osyǵan deıin álem chempıonatyna AQSh, Kanada, Meksıkadan ózge Ońtústik Amerıkadan Argentına, Brazılııa, Ekvador, Ýrýgvaı, Kolýmbııa, Paragvaı, Azııadan Japonııa, Iran, Ózbekstan, Ońtústik Koreıa, Iordanııa, Aýstralııa jáne muhıt aımaǵynan Jańa Zelandııa qatysatyny anyqtaldy.
Ázirge Soltústik Amerıka men Eýropadan eshqandaı qurama álem birinshiliginiń joldamasyn ıelengen joq. Olar irikteý kezeńin qarasha aıynda aıaqtaıdy. Al Afrıkadan Marokko men Týnıs joldama alǵan edi. Bul qurlyqta irikteý kezeńi 14 qazanda máresine jetedi.
Álem chempıonatynda alǵash ret 48 qurama synǵa túsedi. Dúbirli doda 2026 jyldyń 11 maýsym-19 shilde aralyǵynda ótkiziledi.