Mysyr hýsıtterdiń shabýyldary aıasynda Saýd Arabııasyna jan-jaqty qoldaý kórsetýge kelisti
ASTANA. KAZINFORM — Saýd Arabııasy men Iemendegi hýsıtter arasyndaǵy qarýly qaqtyǵys ýshyǵa túsken tusta Kaır koroldiktiń qaýipsizdigin qamtamasyz etý úshin Er-Rııadqa qoldaý kórsetýge daıyn ekenin málimdedi, dep habarlaıdy Kazinform agenttiginiń menshikti tilshisi.
Mysyr prezıdenti Ábdel Fattah ás-Sısıdiń tóraǵalyǵymen ótken Ulttyq qorǵanys keńesi jeksenbide Saýd Arabııasynyń qaýipsizdigin, turaqtylyǵyn, aýmaqtyq tutastyǵyn, resýrstary men ıslamnyń qasıetti oryndaryn qorǵaý úshin oǵan qajetti ári múmkin bolatyn barlyq qoldaý túrin kórsetý týraly sheshim qabyldady.
Bul týraly Mysyr prezıdenti ákimshiliginiń resmı ókili habarlady.
Sheshim Kaırdegi Ál-Ittıhadııa saraıynda ótken keńes otyrysynyń qorytyndysy boıynsha qabyldandy. Jıynda aımaqtaǵy jaǵdaı, ásirese Saýd Arabııasyna jasalǵan shabýyldardyń jıilegeni talqylandy.
Mysyr tarapy koroldiktiń qaýipsizdigin óz eliniń ulttyq qaýipsizdigi men jalpy arab áleminiń qaýipsizdiginiń ajyramas bóligi retinde qarastyratynyn atap ótti.
Sonymen qatar keńes shıelenisti báseńdetý jáne qazirgi daǵdarystardy beıbit jolmen retteý úshin aımaqtyq ári halyqaralyq seriktestermen birlesip, saıası jáne dıplomatııalyq kúsh-jigerdi jandandyrý týraly sheshim qabyldady.
Buǵan deıin Mysyr prezıdenti Ábdel Fattah ás-Sısı parlamentke júginip, Er-Rııad tıisti ótinish jasaǵan jaǵdaıda Saýd Arabııasyna qorǵanys kómegin kórsetý úshin áskerı qyzmetshiler men áskerı tehnıkany jiberýge ruqsat berýdi suraǵan edi.
Reuters agenttiginiń málimetinshe, parlamenttegi daýys berý bastapqyda jeksenbige josparlanǵanymen, talqylaý uzartylǵan. Izraıldiń Ynet basylymy Mysyr parlamentiniń depýtaty Mustafa Bakrıdiń sózine súıenip, sheshim seısenbi, 20 qazanda qabyldanýy múmkin ekenin habarlady.
Alaıda yqtımal áskerı kómektiń naqty qandaı formatta kórsetiletini resmı túrde jarııalanǵan joq.
Mysyrdyń áskerı sarapshysy, general-maıor Muhammed ash-Shahaýı Al-Masry Al-Youm basylymyna bergen túsiniktemesinde kómek áýe shabýylyna qarsy qorǵanys júıelerin ornalastyrýdy, zymyrandar men ushqyshsyz apparattardyń shabýylyna toıtarys berýdi, barlaý derekterimen almasýdy jáne logıstıkalyq qamtamasyz etýdi qamtýy múmkin ekenin aıtty.
Al Lıvannyń Al-Akhbar gazeti aty-jóni atalmaǵan Mysyr áskerı derekkózderine silteme jasap, eldiń jekelegen áskerı qyzmetshileri birneshe aptadan beri Saýd Arabııasynyń aýmaǵynda júrgenin jazdy. Basylymnyń málimetinshe, Kaır áýe shabýylyna qarsy qorǵanys quraldary men strategııalyq nysandardy qorǵaýǵa arnalǵan bólimshelerdi qosymsha ornalastyrý múmkindigin qarastyryp jatyr. Bul rette Iemen aýmaǵyndaǵy shabýyl operatsııalaryna tikeleı qatysý josparlanbaǵan. Alaıda bul aqparat resmı túrde rastalǵan joq.
Óz kezeginde hýsıtter Mysyrdy yqtımal áskerı aralasýdyń saldary týraly eskertti. Qozǵalystyń saıası bıýrosynyń múshesi Muhammed ál-Býheıtı Al-Araby telearnasyna bergen suhbatynda Mysyrdyń 1960-jyldary Iemende júrgizgen áskerı naýqany sátsiz aıaqtalǵanyn eske saldy.
— Mysyr Iemenge qarsy basqynshylyqqa qatysady dep kútpeımiz. Mysyr mundaı áreketke barmaıdy dep senemiz, — dedi ol.
Jaǵdaı Saýd Arabııasy qoldaıtyn, halyqaralyq deńgeıde moıyndalǵan Iemen úkimetiniń kúshteri men hýsıtter arasyndaǵy áskerı qımyldardyń qaıta jandanýyna baılanysty ýshyǵyp otyr.
Keıingi aptalarda hýsıtter koroldik aýmaǵyndaǵy nysandarǵa, sonyń ishinde Er-Rııad halyqaralyq áýejaıy men Saudi Aramco munaı ınfraqurylymyna birqatar zymyran jáne ushqyshsyz apparat shabýyldaryn jasady.
Saýd Arabııasyna jasalǵan shabýyldardan keminde 19 adam qaza tapty. Áýe qatynasyndaǵy shekteý myńdaǵan reıske áser etti. Sonymen qatar Iemen aýmaǵyna soqqylar jalǵasyp jatyr. Atap aıtqanda, hýsıtter baqylaýyndaǵy densaýlyq saqtaý organdary eldiń soltústigindegi Saada provıntsııasyna jasalǵan áýe soqqysynan bes bala bar toǵyz adam qaza tapqanyn habarlady.
Jaǵdaıdyń shıelenisýine baılanysty Er-Rııad aımaqtaǵy odaqtastarymen konsýltatsııalardy jandandyrdy. Jeksenbide Saýd Arabııasynyń qorǵanys mınıstri Halıd bın Salman Abý-Dabıge baryp, BAÁ prezıdenti Muhammed bın Zaıd Ál Nahaıanmen aımaqtyq qaýipsizdik máselelerin talqylady.
Buǵan deıin Reuters agenttiginiń habarlaýynsha, Saýd Arabııasy AQSh-tan da áskerı qoldaý suraǵan. Alaıda Vashıngton hýsıtterge jasalatyn soqqylarǵa tikeleı qatysýdyń ornyna barlaý kómegin usynǵan.
Mysyr men Saýd Arabııasynyń áskerı-saıası jáne ekonomıkalyq baılanystary tyǵyz. 2015 jyly Kaır Er-Rııad bastaǵan hýsıtterge qarsy koalıtsııaǵa qosylǵan edi. Degenmen Mysyrdyń áskerı qımyldarǵa tikeleı qatysýy shekteýli boldy.
Mysyr úshin Qyzyl teńiz ben Sýets kanalyna aparatyn teńiz joly ótetin Bab ál-Mandeb buǵazynyń qaýipsizdigi de mańyzdy. Hýsıtterdiń Iemen jaǵalaýy boıymen alǵa jyljýy jáne halyqaralyq keme qatynasyna tóngen qaýip Kaırdiń ekonomıkalyq múddelerine tikeleı áser etedi. Óıtkeni el kirisiniń edáýir bóligi Sýets kanalyn paıdalanýdan túsedi.
Hýsıtter nege ońtústikke qaraı jyljyǵanyn jáne Saýd Arabııasy qalaı jaýap berýge daıyndalyp jatqanyn myna jerden oqyńyz.
