Mysyr 6 qazanda Izraıl men HAMAS arasyndaǵy kelissóz ótkizetinin jarııalady
ASTANA. KAZINFORM — Mysyr 6 qazanda Izraıl men HAMAS qozǵalysy ókilderiniń kelissózderin ótkizýdi josparlap otyrǵanyn habarlady. Kaırdegi Syrtqy ister mınıstrliginiń málimetinshe, kezdesýde Izraıldik tutqyndar men palestınalyq sottalǵandardy bosatý tetikteri talqylanbaq, dep jazady DW.
Mysyr tarapy kelissózderge Izraıl men palestınalyq HAMAS uıymynyń ókilderin shaqyryp, olardy AQSh prezıdenti Donald Tramptyń beıbit jospary aıasynda ótkizýge bastama kóterdi.
Kelissózder tikeleı formatta ótpeýi múmkin. Kaır SІM-niń habarlaýynsha, bul kezdesý Tramptyń Gazadaǵy áskerı qaqtyǵystardy toqtatý josparyn usynǵannan keıin aımaqta jáne halyqaralyq deńgeıde qalyptasqan serpindi damytýdyń bir bóligi.
Kezdesýdiń naqty ótetin orny ázirge belgisiz. Izraıldiń Ynet basylymy men basqa da derekkózderdiń habarlaýynsha, kelissózder Sharm-esh-Sheıhte, al CNN Arabic Kaırde ótetinin málimdedi. Sondaı-aq, aqparatqa sáıkes, Izraıl delegatsııasyn strategııalyq josparlaý mınıstri jáne premer-mınıstr Bınıamın Netanıahýdyń senimdi ókili Ron Dermer basqarady.
Eske sala keteıik, buǵan deıin HAMAS qozǵalysy «Tramp usynǵan aıyrbas formýlasy» boıynsha Izraılge tiri qalǵan tutqyndardy jáne qaza tapqandardyń denelerin berýge kelisetinin málimdegen bolatyn, eger aıyrbas jasaý úshin qajetti jaǵdaılar jasalsa.
— Qozǵalys deldaldar arqyly osy kelisimniń egjeı-tegjeıin talqylaý úshin kelissózderdi dereý bastaýǵa daıyn ekenin rastaıdy, — delingen HAMAS málimdemesinde.
Sonymen qatar uıym Gazany basqarýdy palestınalyq ulttyq konsensýsqa negizdelgen jáne arab-ıslam elderiniń qoldaýyna ıe táýelsiz organǵa berýge daıyn ekenin habarlady. Alaıda, qozǵalys qarýdy tapsyrý máselesin qozǵamady.
HAMAS basshylary Qatarda AQSh josparynyń keıbir sharttaryn qaıta qaraýdy talap etip otyr.
Buǵan deıin AQSh prezıdenti Donald Tramp Izraılge Gazadaǵy áýe shabýyldaryn toqtatýǵa shaqyrǵan bolatyn. Osydan keıin Izraıldiń saıası basshylyǵy áskerı qımyldardy qysqartý týraly nusqaý bergeni habarlandy.