Mysyqtar obyrdy emdeýdiń jańa tásilderin tabýǵa kómektesýi múmkin

ASTANA. KAZINFORM – Úı mysyqtaryndaǵy obyrdyń alǵashqy genetıkalyq kartasy osy aýrýdyń adamdaǵy túrlerimen aıqyn uqsastyǵyn kórsetti. Ǵalymdardyń aıtýynsha, bul jańalyq janýarlar men adamdardaǵy qaterli isikti emdeýdiń jańa ádisterin ázirleýge jol ashýy múmkin, dep jazdy VVS.

Zertteý barysynda ǵalymdar 500-ge jýyq úı mysyǵynyń isik tinderinen alynǵan DNQ-syn taldady. Nátıjesinde aýrýdyń damýyna yqpal etetin negizgi genetıkalyq mýtatsııalar anyqtaldy.

Obyr mysyqtar arasynda jıi kezdesetin ári ólim-jitimge ákeletin negizgi aýrýlardyń biri bolǵanymen, onyń damý tetikteri áli tolyq zerttelmegen.

Zertteýdi basqarǵan doktor Lýıza Van der Vaıdenniń aıtýynsha, mysyqtardaǵy obyr genetıkasy buǵan deıin jetkilikti deńgeıde zerttelmegen. Onyń pikirinshe, kez kelgen tiri aǵzadaǵy obyr tabıǵatyn tereń túsiný jalpy medıtsınaǵa paıda ákeledi.

Kembrıdjdegi Wellcome Sanger Institute jetekshilik etken halyqaralyq ǵylymı top mysyqtardaǵy obyrdyń 13 túrine qatysty shamamen 1 000 gendi zerttedi.

Zertteý nátıjeleri mysyqtarda obyr týyndatatyn kóptegen genderdiń adamdarda da bar ekenin kórsetti. Bul eki túrdegi isiktiń ósýi men taralýyna ortaq bıologııalyq úderister yqpal etýi múmkin ekenin ańǵartady.

Ǵalymdar ásirese sút bezi obyrynyń keıbir túrlerin, sonyń ishinde úshtik-teris sút bezi obyryn zertteýde mysyqtar mańyzdy model bola alatynyn aıtady. Adamdar arasynda bul túri barlyq sút bezi obyry jaǵdaılarynyń shamamen 15%-yn quraıdy. Al mysyqtarda bul jıi kezdesedi, ǵalymdarǵa kóbirek bıologııalyq materıal men jańa dárilik zattardy synaýǵa múmkindik beredi.

Aıta keteıik, joıylyp bara jatqan jabaıy mysyqtardy Anglııaǵa qaıtarý qarastyrylyp jatyr.