Mıshlen juldyzdy aspazdar qazaq ashanasyna tánti boldy
ALMATY. KAZINFORM – Shveıtsarııadan kelgen áıgili aspazdar Domınık Sato, Fabıo Toffolon jáne Ioshıko Sato – úsh birdeı Michelin juldyzynyń ıegerleri Respýblıka kúni qarsańynda Almatyǵa kelip, sheberlik saǵatyn ótkizip, qazaq ashanasynyń erekshelikterimen tanysty.
Juldyzdy aspazdar Qazaqstanǵa alǵash ret kelip, ulttyq taǵamdarǵa úlken qyzyǵýshylyq tanytty. Olar Almatyǵa kelgen alǵashqy kúnderinen-aq laǵman, qazy, baýyrsaq, pelmen jáne jylqy etinen jasalǵan basqa da taǵamdardy tatyp kórdi.
– Qazaqstanǵa sapar aldynda el týraly kóp estigenbiz, onyń aýmaǵy boıynsha álemde toǵyzynshy orynda ekenin de bildik. Biraq qazaq ashanasymen tek Almatyǵa kelgen soń ǵana tanystyq. Biz baýyrsaq pen qazynyń dámine erekshe rıza boldyq, – dedi Fabıo Toffolon.
Ioshıko Satonyń aıtýynsha, Shveıtsarııada sıyr etinen qazyǵa uqsas taǵam daıyndalǵanymen, jylqy etiniń dámi áldeqaıda erekshe ári baı.
Aspazdar Almatydaǵy Jasyl bazarda bolyp, jergilikti ónimder men dámdeýishterdiń sapasyn joǵary baǵalady. Olardyń pikirinshe, bul ıngredıentter Mıshlen deńgeıindegi as mázirine laıyqty.
Domınık Sato atap ótkendeı, Mıshlen juldyzyna qol jetkizýdiń naqty erejeleri joq, biraq negizgi talaptar aıqyn: aspazdyń kásibıligi, sapaly ónim, maýsymdyq ıngredıentterdi qoldaný, kreatıv pen tepe-teńdik.
– Mıshlen juldyzyn alý úshin bastysy – balansty saqtaý men ónimniń balǵyndyǵy. Buryn tek frantsýz taǵamdary baǵalanatyn, qazir kez kelgen ulttyq ashana joǵary marapatqa laıyq bola alady. Biz Mıshlen ınspektorlarynyń Qazaqstanǵa da keletin ýaqyty jaqyn dep senemiz. Sapaly ónimderińiz bar, sondyqtan bul baǵytta múmkindik zor, – dedi Domınık Sato.
Ioshıko Sato qazaqstandyq aspazdarǵa Japonııa tájirıbesin úlgi etti.
– Bizdiń elde shef-aspazdar aldymen Eýropada tájirıbe jınap, keıin óz elinde sapany arttyrdy. Sol jolmen júrgen soń Mıshlen sarapshylary Japonııaǵa kele bastady. Qazaqstan da osyndaı jolmen damı alady, – dedi ol.
Fabıo Toffolonnyń pikirinshe, juldyz alý úshin tek kásibı sheberlik emes, motıvatsııa men izdenis te mańyzdy.
– Keıbir shefter ózin «juldyz» sanaıdy, biraq jańa nárseni úırenýge yntasy joq. Bul – úlken qatelik. Bilim az bolsa da, úırenýge degen qushtarlyq bolǵany jaqsy. Biz jumysqa qabyldaǵanda kásibılikpen qatar adamnyń ishki motıvatsııasyna da mán beremiz, – dedi ol.
Domınık Sato stýdentterge ótkizgen sheberlik sabaǵynda armandar men maqsattyń mańyzyn erekshe atap ótti.
– Arman men maqsat – kez kelgen jumystyń qozǵaýshy kúshi. Eger maqsat qoısańyz, mindetti túrde jetesiz, – dedi ol.
Juldyzdy aspazdar ózderiniń aspazdyqqa qyzyǵýshylyǵyn balalyq shaqtaǵy esteliktermen baılanystyrdy. Aıtýlarynsha, dámdi taǵamǵa degen súıispenshilikti olarǵa atalary sińirgen, ol qarapaıym ónimderden erekshe dámdi as ázirleı bilgen.
Sapar sońynda qonaqtar Almatynyń erekshe dámin atap ótip, elden eń aldymen laǵmannyń dámin esinde saqtap ketetinderin aıtty.
Eske salaıyq, buǵan deıin aspaz suranysqa te mamandyq ekenin jazǵan bolatynbyz.