«Mıshlen» kompanııasy Qazaqstan naryǵynda óz ónimderin arttyratyndyǵyn jarııalady
ALMATY. Qazannyń 8-i. QazAqparat /Erbol Turymbetov/ - Reseı jáne TMD-daǵy «Mıshlen» avtokólik shınalaryn shyǵarýshy kompanııasy Qazaqstan naryǵynda óz ónimderin arttyratyn bolady. Bul týraly Mıshlen tobynyń Reseı jáne TMD-daǵy Bas dırektory Erık Fedı búgin Almatyda ótken baspasóz máslıhatynda málimdedi.
Mıshlen toby basshylyǵy 2009 jyly qazan aıynda Reseı men basqa da postkeńestik elderge bıznes toptyń jeke aımaǵyn bólý jolyn qarastyrǵan edi. Sonyń nátıjesinde kompanııanyń shyǵys-eýropalyq geografııalyq aımaǵyn bólý týraly sheshimi qabyldandy. Al bul elder buryn bıznes-toptyń eýropalyq geografııalyq aýmaǵyna kirgen bolatyn.
Kompanııa 2006 jyly Qazaqstanda álemdik deńgeıdegi TYREPLUS shına ortalyqtaryn ashý týraly ózderiniń seriktestik baǵdarlamalaryn usynǵan-dy. Sol jyly Kókshetaýda shına ortalyǵyn ashyp, Qazaqstanda alǵash ret kásibı shına ortalyqtaryn damytýdyń negizin qalady.
«Mıshlen tobynda álem boıynsha 109 myń adam qyzmet etedi. Kompanııamyzdyń byltyrǵy jyldyq tabysy 14,8 mlrd. dollardy qurady. Bul kórsetkish bizdiń ónimderimizdiń úlken suranysqa ıe ekendigin kórsetedi. Mıshlen toby endi Qazaqstan naryǵyna belsene qatysady. Osy jyly Qazaqstanda 4 TYREPLUS shına ortalyǵyn ashý josparlanyp otyr», dedi Mıshlen tobynyń Reseı jáne TMD-daǵy Bas dırektory, shyǵys-eýropa aımaǵynyń basshysy Erık Fedı.
Kompanııa ókilderiniń aıtýynsha, endigi maqsat naryq erekshelikteri men tutynýshylar qajettilikterine saı ónimder jetkizý jáne Mıshlen tobynyń shınalaryn dıstrıbýtsııalaýdy damytý. Ol úshin jeńil, jol talǵamaıtyn jáne úlken júk avtokólikterine arnalǵan shınalar el naryǵyna shyǵarylady. Sonymen birge, aýylsharýashylyǵy men iri kólemdi tehnıkalarǵa arnalǵan dońǵalaq shınalary da jetkiziletin bolady.
