Mıshel Obama semizdikke qarsy aktsııa aıasynda serıalǵa tústi
ASTANA. QazAqparat - AQSh-tyń birinshi hanymy Mıshel Obama «Saıabaqtar men demalys oryndary» teleserıalynyń fınaldyq epızodtarynyń birine tústi.
Ol ekrannan osy jyldyń 24 sáýirinde kórsetiledi, dep habarlady serıaldyń túsirilim toby. Atalǵan aqparatty sonymen birge Mıshel Obamanyń ókilderi de rastady, dep habarlady Associated Press .
Oıdan shyǵarylǵan Paýnı qalasyndaǵy saıabaqtar men demalys oryndary departamentiniń jumysyna arnalǵan teleserıaldy daıyndaǵandar prezıdenttiń zaıyby serıalǵa túskennen keıin ózderiniń Twiter-degi jelisinde «Paýnıde semizdikke qarsy kúresti qolǵa alý kerek» dep jazǵan. Bul amerıkandyqtar arasyndaǵy semizdik jáne artyq salmaqpen kúres boıynsha Mıshel Obama ótkizip jatqan «Qozǵalatyn kez keldi» áleýmettik sharaǵa silteme ispettes. Teleserıaldaǵy basty róldi somdaǵan Emı Poýler osydan burynyraq Mıshel Obamamen birge atalmysh naýqannyń aktsııalarynyń birine qatysqan bolatyn.
AQSh-tyń birinshi hanymyna deıin «Saıabaqtar men demalys oryndary» serıalyna eldiń vıtse-prezıdenti Djo Baıden túsken bolatyn. Onyń qatysýymen ótken epızod 2012 jyly kórsetildi.
