Mıshel Djozef Qazaqstanǵa degen qurmetin BAĞALA áni arqyly bildirdi

ASTANA. KAZINFORM – Mońǵolııalyq belgili ánshi, Silk Way Star halyqaralyq jobasynyń jeńimpazy Mıshel Djozef qazaq tilindegi jańa týyndysy – BAĞALA ánin usyndy.

Ánshi 2025 jylǵy qarashada ótken baıqaýdyń grand-fınalyndaǵy jeńisinen keıin qazaqstandyq jankúıerlerine bergen ýádesin osylaı oryndaǵan. Mıshel Djozef qazaq mádenıetine jáne tiliniń kórkemdigine erekshe yqylas bildiretinin atap ótti.

«Men Silk Way Star jobasy kezinde Qazaqstandy shyn júregimmen jaqsy kórip qaldym. Qazaq tili óte baı ári ásem. Baıqaý barysynda kórsetilgen zor qoldaý úshin alǵys retinde tyńdarmandaryma qazaq tilinde án syılaý men úshin mańyzdy boldy», – dedi ánshi.

Jańa án tyńdarmandardy shynaıy sezimdi, ýaqytty, shyǵarmashylyq qýanyshyn jáne jaqyn jandardy baǵalaýǵa úndeıdi. Kompozıtsııa rejısser Q.Jyljaqsynovtyń qatysýymen túsirilgen beınebaıanmen tolyqqan.

Án mátininiń avtorlary – D.Shamuratov pen N.Sharhanuly, al aranjırovkasyn G.Ismbergenov jasaǵan.

Eske salaıyq, Mıshel Djozef «Dostyq ordeni» II dárejeli ordenimen marapattalǵan. Memleket basshysy Qasym-Jomart Toqaevtyń atynan nagradany Memlekettik keńesshi Erlan Qarın tabystady.

Mońǵolııalyq ánshi kórermenderdi tek qýatty vokalymen jáne erekshe sahnalyq obrazdarymen ǵana emes, qazaq ánderin, sonyń ishinde «Qaratorǵaı» týyndysyn sheber oryndaýymen de tánti etti.

Silk Way Star grand-fınaly Astanada ótip, alty tilde tikeleı efırde kórsetildi. Baıqaýdyń barlyq 10 shyǵarylymy Jibek Joly jáne Silk Way telearnalarynda kórsetildi. Sonymen qatar fınal China Media Group quramyndaǵy CCTV-15 qytaılyq telearnasynan da kórsetildi.

Jobanyń jıyntyq aýdıtorııasy 1 mıllıardtan asty.

Halyqaralyq joba Qazaqstan Respýblıkasy Prezıdentiniń Teleradıokesheni men China Media Group arasyndaǵy kelisim aıasynda júzege asyryldy.