Mıshat Fahrýtdınov qyzmetinen ketti
ASTANA. QazAqparat - Óskemendik «Torpedo» hokkeı klýbynyń bas bapkeri Mıshat Fahrýtdınov qyzmetinen ketti. Bul týraly klýbtyń baspasóz qyzmeti habarlady, dep jazady altaynews.kz.
«Kelisimshart taraptardyń ózara kelisimi boıynsha kúshin joıdy» delingen habarlamada.
Aıta keteıik, reseılik maman 28 jeltoqsan kúni qaraǵandylyq «Saryarqamen» ótken oıynǵa da, odan keıingi baspasóz máslıhatyna da qatyspaǵan bolatyn. Sol matchta bas bapkerdiń qyzmetin Evgenıı Fadeev atqardy. Endi mine, araǵa bir aptadaı ýaqyt salyp, óskemendik klýbtyń baspasóz qyzmeti M.Fahrýtdınovtyń qyzmetinen ketkeni týraly resmı málimdeme jasady.
Esterińizge salaıyq, reseılik bapker «Torpedo» tizginin 2017 jyldyń qarasha aıynda ustaǵan bolatyn. Byltyrǵy birinshilik barysynda Fahrýtdınovtyń komandasy pleı-off kezeńiniń 1/8 fınalynda súringen-di.
Komandanyń aıaq alysy bıylǵy birinshilikte de máz emes. 39 kezdesýden keıin 41 upaı jınaǵan jerlesterimiz ázirge týrnır kestesiniń bar bolǵany 16-shy satysynda tur.
