Mırzoıan kóshesimen qozǵalys tamyz aıynyń sońyna deıin jabyldy - Astana qalalyq ІІD JPB
ASTANA. Tamyzdyń 19-y. QazAqparat - Aǵymdaǵy aıdyń sońyna deıin Mırzoıan kóshesi boıynda Imanov pen Tsıolkovskıı kósheleriniń qıylysynan Mırzoıan men Petrov kósheleriniń túıisken jerine deıin kólik qozǵalysy úshin tolyǵymen jabyq bolady. Bul aqparatty Astana qalalyq jol polıtsııasy basqarmasynyń baspasóz qyzmeti taratyp otyr.
Esterińizge sala keteıik, Tamyzdyń 17-sinde Muńaıtpasov kóshesinde júrgiziletin joldyń keshendi qaıta qurastyrylý jumystaryna baılanysty buryn ruqsat etilgen Mırzoıan kóshesindegi kólik qozǵalysy tolyǵymen toqtatyldy.
Qozǵalystyń durys baǵyttary retinde Abylaıhan dańǵyly men Táýelsizdik dańǵylynyń joldary usynylyp otyr.
Buǵan deıin jol jóndeý jumystarynyń bastalýyna oraı shildeniń 16-synan qazannyń 15-ine deıin elordanyń Mırzoıan kóshesimen bir baǵytta qozǵalys qaldyrylyp, Abylaı han dańǵylynan Táýelsizdik dańǵylyna deıin Qajymuqan Muńaıtpasov kóshesinde avtokólik qozǵalysy shektelgen bolatyn.
Muńaıtpasov kóshesin jóndeý jumystary respýblıkalyq bıýdjetten qarjylandyrylady jáne oǵan 3 mıllıard teńgeden astam qarjy ketedi. Negizgi shyǵyndar ınjenerlik jelilerdiń aýystyrylýyna baılanysty bolyp otyr.
Jyl basynan beri Astanada uzyndyǵy 33 shaqyrymdy quraıtyn 15 kóshe jóndeldi. Ekinshi jartyjyldyqta da birqatar kósheni jóndeý josparlanyp otyr. Atap aıtqanda, tamyzdyń 20-na deıin Abaı kóshesinde (Pýshkınnen Ýálıhanov kóshesine deıin), tamyzdyń 30-yna deıin Máskeý kóshesinde (Potanınnen Tilendıev kóshesine deıin), tamyzdyń 15-ine deıin Dýlatov kóshesinde (Baıtursynovtan Ýshakov kóshesine deıin) qozǵalysqa shekteý qoıylady. Sonymen qatar Qonaev, Dostyq, Syǵanaq jáne Seıfýllın kósheleri jóndeletin bolady.
