Mırzıeev pen Lýkashenko strategııalyq seriktestik deklaratsııasyna qol qoıdy
TAShKENT. KAZINFORM – Shavkat Mırzıeevtiń Mınskige resmı sapary aıasynda Ózbekstan men Belarýs arasyndaǵy qarym-qatynasty strategııalyq seriktestik deńgeıine kóterýge baǵyttalǵan deklaratsııaǵa qol qoıyldy, dep habarlaıdy Kazinform agenttiginiń Tashkenttegi menshikti tilshisi.
Sapar aıasynda Shavkat Mırzıeev pen Aleksandr Lýkashenko áýeli shaǵyn quramda kelissóz júrgizdi. Onyń barysynda taraptar eki memleket arasyndaǵy yntymaqtastyqtyń sapa turǵysynan jańa deńgeıge kóterilgenin erekshe atap ótti.
- Keıingi bes jylda ózara taýar aınalymy úsh ese artyp, ótken jyldyń qorytyndysy boıynsha ol shamamen 1 mlrd dollarǵa jýyqtady. 2026 jyldyń basynan beri onyń kólemi taǵy 30%-ǵa ulǵaıdy. Qazirgi tańda 360 birlesken kásiporyn tabysty jumys istep tur, - delingen Ózbekstan basshysynyń baspasóz qyzmeti taratqan habarlamada.
Endi resmı Tashkent pen Mınsk saýda-sattyq kólemin 2 mlrd dollarǵa jetkizýge nıetti.
Shaǵyn quramdaǵy kelissózden keıin prezıdentter resmı delegatsııa músheleriniń qatysýymen otyrys ótkizdi. Onda aýyl sharýashylyǵy, mashına jasaý, farmatsevtıka, jeńil ónerkásip, jıhaz óndirisi jáne basqa da salalardaǵy jańa kooperatsııalyq jobalardy qamtıtyn is-sharalar jospary bekitildi.
Kezdesý qorytyndysy boıynsha Shavkat Mırzıeev pen Aleksandr Lýkashenko Ózbekstan men Belarýs arasynda strategııalyq seriktestik ornatý týraly deklaratsııaǵa qol qoıdy. Sonymen qatar prezıdentterdiń qatysýymen 15-ten astam ekijaqty qujat qabyldandy.
Sapar sońynda Shavkat Mırzıeev áriptesin Ózbekstanǵa resmı saparmen kelýge shaqyrdy.
Eske salaıyq, buǵan deıin Ózbekstan men Majarstan strategııalyq áriptestik deklaratsııasyna qol qoıdy. Sonymen qatar osyndaı qujat resmı Tashkent pen Parıj arasynda qabyldandy.
