Mırzıeev Ózbekstan Konstıtýtsııasy kúnine oraı bir top sottalǵandarǵa raqymshylyq jasady

Ózbekstan Respýblıkasy Konstıtýtsııasynyń qabyldanǵanyna 31 jyl tolýyna oraı Ózbekstan Respýblıkasy Prezıdentı Shavkat Mırzıeev «Jazasyn ótep jatqan, jasaǵan is-áreketine shyn júrekten ókingen jáne kináli dep tanylǵan bir top adamdarǵa raqymshylyq jasaý týraly» Jarlyqqa qol qoıdy dep habarlaıdy Kazinform agenttigi Ózbekstan Respýblıkasy Prezıdentiniń baspasóz qyzmetine silteme jasap.

Qaýlyǵa sáıkes, Ózbekstan Respýblıkasy Konstıtýtsııasynyń 109-baby, 23-tarmaǵyna sáıkes jasaǵan qylmystary úshin qylmystyq-atqarý júıesi mekemelerinde jáne probatsııa organdarynda jazasyn ótep jatqan, jasaǵan áreketine shyn júrekten ókinip, ózin jaqsy jaǵynan kórsete bilgen 334 adamǵa keshirim jasaldy.

Raqymshylyq jasalǵan tulǵalardyń 34-i negizgi jazadan tolyq bosatylsa, 249-y jazasyn óteý merziminen buryn shartty túrde bosatyldy, 6 tulǵanyń bas bostandyǵynan aıyrý jazasy jeńilirek jazamen aýystyryldy. Sondaı-aq 45 adamnyń bas bostandyǵynan aıyrý týraly jaza merzimi qysqardy.

Raqymshylyq jasalǵandardyń 18-i shetel azamattary, 23-i áıelder, 15-i 60 jastan asqandar, 88-i tyıym salynǵan uıymdardyń qyzmetine qatysqandar.

Jarlyqtyń oryndalýyna baılanysty jaýapty mınıstrlikter men vedomstvolarǵa raqymshylyq jasalǵan azamattardyń otbasy men jaqyndaryna oralýyna, qoǵamdyq ómirge beıimdelýine, paıdaly eńbekpen aınalysýyna, salaýatty ómir saltyn qalyptastyrýǵa, qoǵamda laıyqty ornyn tabýǵa kómektesý jóninde tapsyrmalar berildi.