Mırzıeev jún-teri, toqyma salalaryn Italııamen birge damytýdy usyndy

ASTANA. KAZINFORM — Ózbekstan prezıdenti Shavkat Mırzıeev toqyma, jún-teri, tamaq óńdeý salalaryn «OA — Italııa» formatyndaǵy tehnologııalyq kooperatsııanyń basym baǵyttaryna qosýdy usyndy.

— Italııadaǵy isker qaýymdastyqtyń eldiń ınnovatsııalyq damýyndaǵy orny orasan ekenin eskere otyryp, bıznes dıalogyna arnalǵan «Ortalyq Azııa — Italııa» iskerlik klýby» turaqty alańyn iske qosýdy usynamyn. Bul klýb elderimizdiń saýda palatalarynyń janynan jumys isteý kerek. Kásipkerler ortasy keńinen qatysatyn mundaı kezdesýlerdi saýda-ınvestıtsııalyq yntymaqtastyqqa jańa múmkindikter ashý úshin jyl saıyn bizdiń astanamyzda ótkizýge bolady, — dedi Ózbekstan basshysy.

Sondaı-aq, ol kooperatsııanyń bir ortalyǵy Tashkent bola alatynyn meńzedi.

— Mıneraldy resýrstar men aýylsharýashylyq shıkizatyn tereń óńdeý, elektrotehnıka, hımııa, toqyma, jún-teri, tamaq ónerkásibi, qurandy bólshekter men ónerkásip taýarlarynyń óndiris bazasyn jergilikti ortada oqshaýlaý, jetekshi ıtalııalyq brendterge negizdelgen dızaınerlik ortalyqtaryn qurý sııaqty qaıta óńdeý salalary kooperatsııanyń basym baǵyttary bola alar edi. Aımaqtyq mánge ıe jobalardy iske asyrý úshin Tashkent óńirinde eýropalyq operatorlar basqaratyn arnaıy park qurýǵa kiristik. Kooperatsııa jobalaryn qoldaýǵa Italııanyń memlekettik agenttikterin, birlesken ınvestıtsııalyq qorlaryn tartý qajet dep topshylaımyz, — dedi Shavkat Mırzıeev.

Aıta keteıik, elordadaǵy Táýelsizdik saraıynda Memleket basshysy Qasym-Jomart Toqaevtyń qatysýymen «Ortalyq Azııa — Italııa» alǵashqy sammıti ótip jatyr. 

Sondaı-aq, búgin túske deıin Memleket basshysy Qasym-Jomart Toqaev pen Italııa Mınıstrler Keńesiniń tóraǵasy Djordja Melonı Astana halyqaralyq forýmynyń ekinshi kúnindegi plenarlyq sessııaǵa qatysty. 

Budan keıin Qazaqstan Prezıdenti men Italııa Premer-mınıstri Aqordadaǵy kelissóz qorytyndysy boıynsha Strategııalyq seriktestikti keńeıtý jóninde Birlesken málimdeme qabyldaǵan bolatyn.