Mirjan Jaqsylyqov PABA chempıony atandy
ALMATY. Qarashanyń 30-y. QazAqparat /Erlik Erjanuly/ - Mirjan Jaqsylyqov ótken senbide Almatyda ótken kásipqoı boks týrnırinde Panazııalyq boks qaýymdastyǵynyń (PABA) nusqasy boıynsha Azııa chempıony ataǵyna ıe boldy,
dep habarlaıdy QazAqparat.
3 mınýttan turatyn 11 raýndyq bul jekpe-jektiń sýpervaızeri Bolat Mankenov, promoýteri Marat Mázimbaev bolǵan edi. Onda 57,2 kılá salmaqta taılandyq Pısadeng Kıasakthanı óziniń chempıondyq ataǵyn qorǵaı almaı qaldy. Chempıondyqtan úmitker qazaqstandyq Mirjan Jaqsylyqov 7-shi raýndtyń 2-shi mınýty 53-shi sekýndynda qarsylasyn búırekten uryp esten tandyrdy. P. Kıasthanıdiń bul 8-shi jeńilisi boldy. Buǵan deıin 27 jekpe-jek ótkizgen boksshy onyń 20-synda jeńis toılaǵan bolatyn. Al Rahat Ahmadıevten tálim alatyn Mirjannyń bul kásipqoı bokstaǵy 8-shi kezdesýi. M. Jaqsylyqov bul kezdesýlerdiń bárinde (úsheýi nokaýtpen) mereıi ústem boldy.
1985 jyly tamyzdyń 4-inde Shyǵys Qazaqstan oblysynyń Aıagóz qalasynda ómirge kelgen Mirjan boks qolǵabyn qolyna alǵash ret 12 jasynda kıgen bolatyn. Áýesqoı boksta 2000-2004 jyldary Qazaqstan chempıonatynda top jarǵan jas boksshy, QR ýnıversıdasynda da úzdikter qatarynan oryn aldy. Sondaı-aq kadetter arasyndaǵy Álem chempıonatynda qola júldeger atanǵan bolatyn. Qazirgi tańda baǵyn kásipqoı boksta synap júrgen ol Marat Mázimbaevtyń «Snaıper» klýbynda jattyǵyp júr.
