Myrzaǵalı Aıtjanov: Endigi maqsat — Olımpıada medali

ASTANA. KAZINFORM – Bokstan Ulttyq quramanyń bas bapkeri Myrzaǵalı Aıtjanov Italııanyń Býsto-Arsıtsıo qalasynda ótken lıtsenzııalyq týrnırden keıingi josparymen bólisti.  

«Osyǵan deıingi basty maqsatymyz, armanymyz Parıj Olımpıadasyna tolyq quramda joldama alý bolatyn. Mine, sol jospardyń 90 paıyzy oryndaldy. Tek 63,5 keli salmaqta joldama joq. Buıyrsa ony da alamyz degen nıettemiz. Endigi basty maqsat – Parıj tórinde medalǵa qol jetkizý. Elimizdiń týyn jeńis tuǵyrynda jelbiretý», - dedi Myrzaǵalı Aıtjanov KAZINFORM tilshisine bergen suhbatynda.

Sonymen qatar Aıtjanov joldamaǵa qol jetkizgen boksshylar elge oralǵan soń eki apta demalyp, ary qaraı arnaıy baǵdarlama boıynsha Olımpıadaǵa daıyndyqty bastaıtynyn aıtty.

«Lıtsenzııalyq týrnırde barlyq boksshylarymyz aıanyp qalǵan joq. Sonyń nátıjesinde bes boksshymyz joldamaǵa qol jetkizdi. Jarys barysynda biri murynyn, biri qabaǵyn jaryp alsa, al taǵy bireýi qolyn, býynyn aýyrtyp alǵan. Boksshylarymyzǵa osyndaı kishigirim jaraqattaryn tolyq qalpyna keltirip, demalyp alǵansha eki apta demalys beremiz. Ary qaraı jospar boıynsha belgilengen arnaıy oqý-jattyǵý jıyndary bastalady», - dedi bapker.

Esterińizge sala keteıik, osyǵan deıin bas bapker Muhamedsabyr Bazarbaıulynyń ne úshin jarysty erte aıaqtaǵanyn túsindirip bergen edi.

Aıta keteıik, bokstan Qazaqstan erler quramasynyń qorjynynda búginge deıin alty joldama bar. Olardy Sáken Bıbosynov (51 kg), Sabyrhan Mahmud (57 kg), Aslanbek Shymbergenov (71 kg), Nurbek Oralbaı (80 kg), Aıbek Oralbaı (92 kg) jáne Qamshybek Qońqabaev (+92 kg) jeńip aldy.