Myrzabosynov Shaıdorovtyń jattyqtyrýshysy aýysýyna qatysty pikir bildirdi

ASTANA. KAZINFORM – Olımpıada chempıony Mıhaıl Shaıdorov jańa olımpıadalyq tsıklge baılanysty jattyqtyrýshylar quramyn ózgertýge quqyly. Al onyń burynǵy bapkeri Alekseı Ýrmanovpen kelisimshart toqtatylǵanymen, federatsııa mamanmen baılanysty úzbeıdi. Bul týraly QR Týrızm jáne sport mınıstri Erbol Myrzabosynov Ortalyq kommýnıkatsııalar qyzmetinde ótken baspasóz máslıhatynda jýrnalısterdiń suraǵyna jaýap bere otyryp málimdedi.

p
Foto: Soltan Jeksenbekov / Kazinform

Mınıstr aldymen Alekseı Ýrmanovtyń otandyq mánerlep syrǵanaý sportyna sińirgen eńbegine toqtalyp, oǵan alǵys bildirdi.

– Alekseı Ýrmanovqa úlken alǵys aıtqymyz keledi. Ol ózi Olımpıada altynyn jeńip alǵan jáne Olımpıada chempıonyn tárbıeleýge kómektesken maman. Osy úsh jylda Mıhaıldiń komandasymen birge aýqymdy jumys atqaryldy. Aldaǵy ýaqytta Alekseı Ýrmanov bizdiń jas býyn sportshylarmen de jumys isteıdi dep úmittenemiz, – dedi mınıstr.

Erbol Myrzabosynovtyń aıtýynsha, Mıhaıl Shaıdorov jańa olımpıadalyq tsıklge daıyndyqty bastap ketken. Jyl basynan beri sportshy 13 oqý-jattyǵý jıynyna qatysyp, tórt-bes jarysta óner kórsetken.

Mınıstr qazirgi kezeńde Olımpıada chempıonynyń jańa komanda jasaqtap, kúrdeli elementterdi jetildirý baǵytynda jumys isteýge múmkindigi bar ekenin atap ótti.

– Mıhaıl Shaıdorovtyń jańa tsıkli bastaldy. Ol Olımpıada chempıony retinde jańa komanda tańdap, jańa elementtermen jumys isteýge quqyly. Biz ony árdaıym qoldaımyz. Olımpıada chempıony mártebesinde jarystarǵa qatysý ońaı emes ekenin Mıhaıldiń ózi de aıtyp júr. Degenmen onyń bul kezeńnen ótetinine senimdimiz, – dedi Erbol Myrzabosynov.

Sondaı-aq mınıstr aldaǵy Azııa oıyndaryna daıyndyqqa toqtaldy. Onyń aıtýynsha, 2029 jyly Almatyda ótetin Azııa oıyndaryna deıin sportshynyń jańa kezeńge beıimdelip, sheberligin shyńdaýyna jetkilikti ýaqyt bar.

Budan bólek, vedomstvo basshysy Alekseı Ýrmanovpen qarym-qatynas úzilmegenin jetkizdi. Olımpıadadan keıin de taraptar tyǵyz baılanysta jumys istep keledi. Federatsııa tarapynan bapkerge Almaty qalasynan páter berilgen.

Aıta keteıik, Mıhaıl Shaıdorov ISU álemdik reıtınginde ekinshi orynǵa kóterildi.