Mıroslav Encha: BUU Qazaqstannyń halyqaralyq bastamalaryn qoldaıdy
NUR-SULTAN. QazAqparat - Qazaqstan Respýblıkasy Parlamenti Senatynyń tóraǵasy Darıǵa Nazarbaeva BUU Bas hatshysynyń saıası máseleler jónindegi kómekshisi Mıroslav Enchamen kezdesti, dep habarlaıdy QR Parlamenti Senatynyń baspasóz qyzmeti.
Kezdesý barysynda Ortalyq Azııadaǵy qaýipsizdikti qoldaý, óńirlik yntymaqtastyq jáne halyqaralyq kún tártibiniń máseleleri talqylandy.
Senat tóraǵasy Qazaqstan halyqaralyq qaýipsizdiktiń asa mańyzdy qaýip-qaterleri men damý salasyndaǵy ózekti máselelerdi sheshýdegi BUU-nyń jetekshi rólin udaıy qoldap kele jatqanyn atap ótti.
«Búgingi tańda BUU beıbitshilik pen qaýipsizdikti qamtamasyz etý úshin halyqaralyq qaýymdastyqtyń kúsh-jigerin biriktirýge qabiletti birden-bir jahandyq uıym bolyp tabylady. Qazaqstan osy uıymnyń ustanymdary men qundylyqtaryna árdaıym óziniń adaldyǵyn kórsetip keledi», - dedi D.Nazarbaeva.
Jahandyq qaýipsizdikti qamtamasyz etýdegi Qazaqstannyń aıryqsha rólin atap ótken M.Encha BUU ıadrolyq qarýsyzdandyrý jáne onyń taralmaýy úderisterine qosqan Qazaqstannyń Tuńǵysh Prezıdenti N.Nazarbaevtyń úlesin, sondaı-aq Qazaqstannyń Sırııa úderisteri men aýǵan máselelerin retteý jónindegi mańyzdy bastamalaryn joǵary baǵalaıtynyn atap ótti.
«Qazaqstan Aýǵanstannyń turaqty, ekonomıkalyq ornyqty jáne qaýipsiz damýyna múddeli. Aýǵanstandy qater retinde emes, mańyzdy seriktes retinde kórinýin mańyzdy dep sanaımyz», - dedi D.Nazarbaeva.
Kezdesýde Aýǵanstandy osy eldegi jaǵdaıdy odan ári turaqtandyrýdyń mańyzdy sharty retinde óńirlik yntymaqtastyq aıasynda yqpaldasýdyń mańyzdylyǵy atalyp ótti. Senat basshysy «Aýǵanstandaǵy áıelderdiń quqyqtary men múmkindikterin keńeıtý» aımaqtyq konferentsııasynyń qorytyndysy týraly habarlady. Sharanyń maqsaty - eldegi áıelder men qyzdardyń naqty qajettilikteri týraly halyqaralyq habardarlyqty arttyrý, olardyń quqyqtary men múmkindikterin ilgeriletý jáne keńeıtý bolyp otyr.
Genderlik teńdikti ilgeriletý máselelerin talqylaı kelip, joǵarǵy Palata basshysy áıelderdiń jahandyq damýy men órkendeýi jónindegi Tramptyń bastamasyn atap ótti. D.Nazarbaeva aımaq áıelderine ózderiniń ekonomıkalyq áleýetin júzege asyrýǵa múmkindik berý maqsatynda Ortalyq Azııa men Aýǵanstanda osy bastamany júzege asyrýda yntymaqtastyqqa daıyn ekendigin aıtty.
M.Encha BUU-nyń mańyzdy bastamalaryn, atap aıtqanda, ornyqty damý maqsattaryna qol jetkizýde BUU-nyń múshe memleketterge kómek kórsetý jónindegi qyzmetin nyǵaıtýǵa baǵyttalǵan uıymnyń damý júıesin reformalaý jónindegi Bas hatshy A.Gýterrıshtiń bastamasyn qoldaǵany úshin Qazaqstanǵa alǵysyn bildirdi.
«Qazaqstan beıbitshilik, turaqtylyq jáne qaýipsizdik isine zor úles qosýda. Biz ony joǵary baǵalaımyz. Qarqyndy yntymaqtastyq úshin alǵys aıtamyz», - dedi BUU Bas hatshysynyń saıası máseleler jónindegi kómekshisi.
