Mırbolat Aıýpovqa Vladımır Zvorykın atyndaǵy syılyq berildi
ASTANA. QazAqparat - «Qazmedıa ortalyǵy» Basqarýshy kompanııasy» JShS Bas dırektory Mırbolat Aıýpovqa «Teledıdar, radıohabar taratýǵa jáne onymen baılanysty tehnologııalardy damytýǵa qosqan úlesi úshin» nomınatsııasy boıynsha Vladımır Zvorykın atyndaǵy syılyq tabys etildi, dep habarlaıdy «QazAqparat» HAA tilshisi.
25 qazanda Máskeýde HHІ UTQ (Ulttyq teleradıohabar taratýshylar qaýymdastyǵy) Halyqaralyq kongresi men NATEXPO kórmesi aıasynda televızııa salasyndaǵy tehnologııalardy jáne ınjenerlik uıǵarymdardy damytý boıynsha úles qosqany úshin marapattalatyn Vladımır Zvorkın atyndaǵy besinshi syılyqty tapsyrý rásimi ótti.
Júlde tórt nomınatsııa boıynsha: «Telekommýnıkatsııalyq tehnologııalar salasyndaǵy jetistikteri úshin», «Federaldy jáne aımaqtyq deńgeıde televızııalyq jáne radıohabar taratý salasynda júıelik ıntegratsııasy úshin», «Teleradıo óndirisi salasyndaǵy jabdyqtardy/tehnologııalardy jasaǵany jáne/nemese jetildirgeni úshin» jáne «Teledıdar, radıohabar taratýǵa jáne onymen baılanysty tehnologııalardy damytýǵa qosqan úlesi úshin» beriledi.
UTQ Vladımır Zvorykın atyndaǵy syılyqty 2013 jyly bekitti. Marapattaý rásimi Halyq sharýashylyǵy jetistikteriniń kórmesinde (HShJK) ótti.
