«Mıras» qoǵamdyq keńesi kezekten tys prezıdent saılaýyn ótkizý bastamasyn qoldaıdy

ASTANA. QazAqparat - Búgin «Nur Otan» partııasy janyndaǵy mádenıet pen ónerdi damytý máseleleri jónindegi «Mıras» qoǵamdyq keńesiniń otyrysynda Qazaqstan halqy Assambleıasynyń kezekten tys prezıdenttik saılaý ótkizý týraly bastamasyna qoldaý bildirildi.

Keńes otyrysynda Assambleıa tarapynan kóterilgen bastamaǵa qatysty áńgime órbip, onyń aıaǵy Úndeý qabyldaý týraly ortaq pikirge ulasty. «Qazaqstan halqy Assambleıasynyń prezıdenttk saılaý ótkizý týraly bastamasy ótken aptada ǵana týǵan joq, odan buryn da áńgime bolyp júrgen. Eldiń óńirlerinen qushaq-qushaq hattar kelip jatyr. Sonyń ishinde Assambleıa shańyraǵynyń astyndaǵy ózge ult ókilderiniń mádenı ortalyqtary birazdan beri osy máseleni aıtyp júrgen. Bunyń da neshe túrli sebepteri barshylyq. Máselen, kezekti prezıdent saılaýy 2016 jyly belgilengen. Al sarapshylar álemdik daǵdarystyń shyńy da sol tusqa taqaıtynyn aıtyp jatyr. Sonymen qatar, bir jylda eki saılaý ótkizý de qısynsyz. Endeshe, biz saılaýmen aınalysamyz ba, joq daǵdaryspen aıqasamyz ba?», - dedi «Mıras» qoǵamdyq keńesiniń múshesi Myrzataı Joldasbekov.

Onyń aıtýynsha, bıylǵy jaǵdaıymyz jaman emes, ony keıinge qaldyratyn da esh sebep joq, kerisinshe bıylǵy merzim ońtaıly. «Halyqtyń bári, qoǵamdyq uıymdar, jastar bastamany qoldap otyr. Bizdiń «Mıras» keńesi de osy Úndeýge qosylýy tıis», - dedi M. Joldasbekov.

Al keńes múshesi Bekbolat Tileýhan kezekten tys saılaý týraly usynys jalpyhalyqtyq qoldaýǵa ulasqanyn aıta kele, munyń qaı turǵydan alǵanda da paıdasy artyq shara ekenin alǵa tartady. «Berekeniń, eldiń birliginiń arqasynda biraz dúnıe Qazaqstannyń ıgiligine qaraı oıysyp jatyr. Degenmen, bizdiń esh qatysymyz bolmasa da, búkil álemniń basynda daǵdarys oınap turǵan kezeńde isteletin isterdiń bári jan-jaqqa burylmaı, bir tusqa shoǵyrlansa ıgi. ıAǵnı, beınelep aıtqanda, osyndaı kezeńde attan túsip, erdiń aıyl-tartpasyn bekitip, ótpeli kezeńnen ótip ketý. Assambleıa tarapynan jasalǵan usynysqa ózimizdiń býynnyń, qaýymnyń, jyrshylar qaýymynyń, ulttyq sportta júrgen qaýymnyń atynan qoldaý kórsetkim keledi. Bul -azamattyq paryzymyz. Shyndyǵynda, daǵdarystyń qıynshylyǵy etekten tartyp, tóske órlemeı turǵanda osy usynysty qoldap jibersek, «Mıras» atynan úndeýge qosylsaq quba qup», - dedi Bekbolat Tileýhan.