«Mıranda qaǵıdaty» ómirsheńdigin dáleldegen — advokat
ASTANA. KAZINFORM — Respýblıkalyq advokattar alqasynyń tóraǵasy Mádı Myrzaǵaraev Jibek Joly telearnasynyń «Búgin LIVE» baǵdarlamasynda jańa Konstıtýtsııada «Mıranda qaǵıdaty» bekitilýiniń mańyzyn túsindirdi.
— Basyna is túsken adamdy abdyraý, úreı, qorqynysh sııaqty sezimder bıleıtini anyq. Sol kezde kelgen polıtseı nemese basqa da kúshtik qurylym ókilderi oǵan «Bitken jeriń osy, endi túrmege qamalasyń» degen sózdermen qysym kórsetkeninen góri, «Únsizdik saqtaýǵa quqyǵyńyz bar, ózińizge qarsy aıǵaq bermeýge quqylysyz, advokattyń kómegine júgine alasyz» dep quqyqtaryn túsindirgeni jaqsyraq. Sonda ol jerdegi atmosfera da ózgerip, azamatta senim paıda bolady. «Mıranda qaǵıdaty» ómirsheńdigin dáleldegen. Damyǵan elderde ondaǵan jyl boıy qoldanylyp kele jatyr. Qarapaıym bolyp kóringenmen, azamattarǵa beretini kóp. «Mıranda qaǵıdaty» arqyly adamdarǵa quqyǵyn túsindirýdiń arqasynda talaı kisi óziniń quqyǵyn, bostandyǵyn qorǵap shyǵýy ábden múmkin, — dedi ol.
Aıta keteıik, buǵan deıin azamattar ustanatyn qundylyqtar Konstıtýtsııaǵa jazylǵanyn jarııalaǵanbyz.
