«Mıranda» qaǵıdaty adam quqyǵyn qorǵaýda mańyzdy ról atqarady – Serik Aqylbaı

ASTANA. KAZINFORM – Qazaqstanda Konstıtýtsııalyq reforma aıasynda adam bostandyǵyn qorǵaýǵa qatysty mańyzdy ózgerister talqylanyp jatyr. Sonyń ishinde, adamdy qamaýǵa alǵan sátte onyń quqyqtaryn birden túsindirý jáne tergeý merzimin azaıtý máselesi kóterildi. 

Bul bastamanyń mán-jaıyn «Qazaqstan zańgerler odaǵynyń» tóraǵasy Serik Aqylbaı Jibek Joly arnasyna bergen suhbatynda egjeı-tegjeıli aıtyp berdi.

Zańgerdiń aıtýynsha, adamdy ýaqytsha oqshaýlaý merzimin qysqartý tergeýshiler tarapynan bolatyn zańsyz áreketterdiń aldyn alady.

– Qazirgi usynys – kúdiktini qamaýda ustaý ýaqytyn 48 saǵatqa deıin qysqartý. Sebebi adam uzaq ýaqyt qamaýda otyrsa, tergeýshiler tarapynan psıhologııalyq nemese fızıkalyq qysym kórip, konstıtýtsııalyq quqyqtary buzylýy múmkin. Sondyqtan bul óte der kezinde jasalyp jatqan qadam, - dedi Serik Aqylbaı.

Bul rette sarapshy «Mıranda» qaǵıdatynyń mańyzdylyǵyna toqtaldy. Bul halyqaralyq tájirıbe boıynsha, polıtsııa kúdiktini qamaýǵa alǵan nemese tergeýdi bastaǵan sátte oǵan óz quqyqtaryn mindetti túrde aıtylý kerek.

Mamannyń sózinshe, álemdik tájirıbede bar «Mıranda» qaǵıdasyn engizý – demokratııalyq qoǵamnyń belgisi. Bul ereje boıynsha, tártip saqshylary adamdy qolǵa túsirgen sátte únsiz qalý quqyǵyn, aıtqan sózderiniń sotta ózine qarsy qoldanylýy múmkin ekendigin, advokat kómegine júginý quqyǵy jáne memleket esebinen advokat alý quqyǵy baryn aıtýǵa mindetti.

Eger bul quqyqtar túsindirilmese, kúdiktiniń aıtqan sózderi sotta dálel retinde jaramsyz dep tanylýy múmkin.

Aıta keteıik, Konstıtýtsııalyq komıssııa músheleri buǵan deıin 72 saǵatqa sozylǵan qamaý merzimin 48 saǵatqa deıin azaıtýdy qoldap otyr.