«Mır tankov» oıynynyń Reseıdegi bolashaǵy belgisiz — kompanııa ókilderiniń málimdemesi
ASTANA. KAZINFORM - Kazinform agenttiginiń tilshisi Reseı aýmaǵynda tanymal onlaın-oıyn — «World of Tanks»-tiń jumysyna tyıym salynǵany belgili bolǵannan keıin, Lesta Games kompanııasyna resmı saýal joldady. Kompanııa ókilderi bul jaǵdaıǵa qatysty pikir bildirdi.
Halyqaralyq aktıvterge bul sheshim áser ete me?
Kompanııanyń habarlaýynsha, «Lesta Games»-tiń qyzmeti ekstremıstik dep tanylǵan joq. Sot isi ákimshilik sıpatta bolǵan jáne tek jeke tulǵalar Vıktor Kıslyı men Malık Hatajaevqa qatysty qozǵalǵan. Aıyptaý tek Malıka Hatajaevqa qatysty bolǵanymen, «Lesta» onyń menshigi bolǵandyqtan, kompanııaǵa qatysty shekteý sharalary da qoldanylǵan. Qazirgi ýaqytta «Lesta» memlekettik menshikke ótken. Eger onyń qyzmeti ekstremıstik dep tanylǵanda, bul múmkin bolmas edi.
Halyqaralyq seriktestik máselesi oıyn lıtsenzııalary boıynsha aldaǵy saıasatqa baılanysty sheshilmek. Lıtsenzııa Wargaming kompanııasyna tıesili.
Bul sheshimge apellıatsııalyq nemese halyqaralyq tártippen shaǵymdanýǵa bola ma?
Kompanııa ókilderiniń aıtýynsha, Malık Hatajaevqa qatysty sot sheshimine Reseı zańnamasy aıasynda apellıatsııalyq shaǵym berilmek. Olardyń pikirinshe, bul aıyptaý — qundy aktıvti basyp alýǵa baǵyttalǵan áreket. Ýaqytsha basqarýshy men keıingi jańa menshik ıesi osy protseste múddeli tarap bolýy múmkin. Mysal retinde halyqaralyq ınvestıtsııalyq qor — Gem Capital keltiriledi. Aqparat kózderiniń málimetinshe, bul qor sońǵy bir jyl ishinde «Lesta» kompanııasyn satyp alýǵa qyzyǵýshylyq tanytyp, burynǵy menshik ıesine ulttyqtandyrý qaýpin eskertken.
«World of Tanks» brendi men zııatkerlik menshik quqyqtaryn qoldanýǵa Reseı aýmaǵynda tyıym salynǵan ba?
Reseı men Belarýs aýmaǵynda «Mır tankov», «Mır korableı» jáne Tanks Blitz ataýlarymen lokalızatsııalanǵan nusqalar qoljetimdi. Al bastapqy ataýlardaǵy oıyndar — World of Tanks, World of Warships jáne World of Tanks Blitz — bul elderde resmı túrde qoljetimsiz.
Oıynshylardy basqa platformalarǵa nemese oıyndarǵa baǵyttaý arqyly zalaldy óteý múmkin be?
— Onlaın-oıyndar salasyndaǵy geımdevke kelsek, mundaı operatsııany álemde eshbir kompanııa júzege asyra almaıdy. Bul — biregeı ónimder. Olar aýdıtorııany basqa oıyndardan tartqan joq, óz aýdıtorııasyn uzaq jyl boıy qalyptastyrdy. Bir kezderi adamdar kompıýterdi úırenýdi tek «Tankterdi» oınaý úshin bastaǵan, — deıdi «Lesta Games» kompanııasynyń bıznesti damytý jónindegi dırektory Gaýhar Aldııarova.
Onyń aıtýynsha, onlaın-oıyndar ındýstrııasynda bir jobadan ekinshisine aýdıtorııany «aýystyrý» múmkin emes, mundaı tetik jumys istemeıdi.
IP tyıym salynǵan jaǵdaıda, «beıtarap» nusqasyn shyǵarý múmkin be?
Kompanııa ókilderi IP-ge (zııatkerlik menshikke) tyıym salynǵan jaǵdaıda, onlaın-oıynnyń t.s.s. «beıtarap» nusqasyn tehnıkalyq jáne zańdyq turǵyda shyǵarý múmkin emes ekenin málimdedi. Mundaı ónimderdi «kóshirý» nemese «urlaý» múmkin emes, sebebi olar kóptegen lıtsenzııalyq kelisimderge negizdelgen. Máselen, «Mır tankov» jobasynyń ózinde ǵana 100-den astam tehnologııalyq sheshimderge — dybystyq júıelerden bastap, fızıka jáne ınterfeıs júıelerine deıin — lıtsenzııa alynǵan. Bul komponenttersiz oıyndy tolyqqandy qoldaý jáne damytý múmkin bolmaıdy.
Eske sala keteıik, buǵan deıin sot «Lesta» kompanııasynyń qyzmetine tyıym salý týraly sheshim shyǵarǵan. Bul sheshim beıneoıyndar ázirleýshisin ekstremıster men terrorıster tizimine engizýge negiz bolýy múmkin.