Mınýs 2,5 kg nemese plıýs 2 kg: depressııaǵa qarsy dári salmaq pen densaýlyqqa qalaı áser etedi
ASTANA.KAZINFORM - Depressııaǵa qarsy dári em bastalǵannan keıin birneshe apta ishinde salmaqqa, júrek soǵý jyldamdyǵyna jáne qan qysymyna áser etedi, dep habarlaıdy Kazinform menshikti tilshisi.
Búgingi tańda Eýropa men Soltústik Amerıkadaǵy eresekterdiń 20% -y depressııaǵa qarsy dári qabyldaıdy. Bul dári-dármekter depressııaǵa ǵana emes, sonymen qatar mazasyzdyqtyń, uıqynyń buzylýyna jáne basqa psıhıkalyq densaýlyq jaǵdaılaryna da taǵaıyndalady.
Olardyń janama áseri burynnan belgili bolǵanymen, denege áser etýinde qanshalyqty erekshelenetini osy ýaqytqa deıin belgisiz boldy.
Londondaǵy Kıngs kolledji men Oksford ýnıversıtetiniń ǵalymdary 58 000-nan astam adam qatysqan 151 klınıkalyq synaqtyń derekterine taldaý jasady. Bul zertteýler 30 túrli depressııaǵa qarsy dári qabyldaǵan patsıentterdegi dene salmaǵy, júrek soǵý jıiligi jáne qan qysymy sııaqty fızıkalyq ózgeristerdi baǵalady.
Nátıjeler búkil álemde eń jıi taǵaıyndalǵan mundaı dáriler SSRI (serotonındi keri qarmaýdyń selektıvti tejegishteri) ádette fızıkalyq janama áserlerdi azaıtatynyn kórsetti. Alaıda, keıbir basqa dáriler muqııat medıtsınalyq baqylaýdy qajet etýi múmkin.
Preparattar arasyndaǵy aıyrmashylyqtar emdeýdiń qysqa kýrstarynda da baıqaldy. Mysaly, agomelatın qabyldaǵan emdelýshiler orta eseppen shamamen 2,5 kg joǵaltqan, al maprotılın qabyldaǵandar kerisinshe, shamamen 2 kılogram qosqan.
Sondaı-aq amıtrıptılın qabyldaǵan patsıentterdiń jartysyna jýyǵynda dene salmaǵynyń joǵarylaýy baıqaldy. Basqa parametrlerde de aıyrmashylyqtar bar: mysaly, flývoksamın men nortrıptılın arasynda júrek soǵý jıiligi mınýtyna 21 ret soǵýǵa deıin kóterilgen.
The Lancet basylymynda jarııalanǵan zertteýdiń avtorlary jeke qaýipter men patsıentterdiń erekshelikterin eskere otyryp, antıdepressanttar taǵaıyndaý boıynsha klınıkalyq nusqaýlardy qaıta qaraýǵa shaqyrady.
Buǵan deıin jahandyq dertke aınalǵan depressııamen qazaqstandyqtar qalaı kúresip jatqany habarlanǵan bolatyn.