Mınskiniń «Dınamosy» astanalyq «Barys» komandasyn aıqyn basymdyqpen utty
ASTANA. 23 qarasha. QazAqparat /Rýslan Ǵabbasov/ - Keshe keshkisin Qurlyqtyq hokkeı lıgasy aıasynda Astanada ótken oıynda elordalyq «Barysty» Mınskiniń «Dınamo» komandasy aıqyn basymdyqpen utty.
Atap aıtqanda, oıynnyń birinshi kezeńinde qonaqtar astanalyqtardyń qaqpasyna 3 birdeı shaıbany qatarynan saldy. Al óz kezeginde osy tartysty dodanyń birinshi kezeńinde «Barys» hokkeıshileri bir ǵana shaıbany salyp, ese qaıtara aldy. Osydan keıingi eki kezeń ishinde astanalyq komanda qanshalyqty shabýyl jasap tyrysqanymen, tek bir ǵana shaıbany salýǵa qaýqarly boldy. Mınsk hokkeıshileri bolsa esepti eselep, keshegi oıyndy 2:6 esebimen óz paıdasyna utty.
Endi 26 qarashadan bastap «Barys» kelesi oıyndaryn syrt alańda ótkizedi. Onda elordalyq komanda «Spartak», «Severstal» jáne «Vıtıaz» hokkeıshilerimen kezdesedi.
