Mınskilik kásipker Pavlodarǵa tramvaılardy jetkizý nege keshiktirilgenin túsindirdi
ASTANA. QazAqparat - Pavlodar qalasyna belarýstik tramvaılardyń keshigip kelý sebepterin jaýapty kásiporyn túsindirdi, dep habarlaıdy pavlodarnews.kz.
Bul týraly «Belkommýnmash» ýnıtarly kásiporynnyń dırektory, bas qurastyrýshy Oleg Bytsko aıtty.
«Ókinishke qaraı, daǵdarys bizben birlese jumys isteıtin birneshe kásiporynnyń jumysyna kedergi keltirdi, - deıdi bas qurastyrýshy. - Sondyqtan bizge tramvaı qozǵaltqyshyn jasap berýge jaýapty Pskov elektr mehanıkalyq zaýyty óziniń ishki tapsyrysyn alyp, bizdi ekinshi kezekke qoıǵan. Pavlodar halqynan sol úshin keshirim suraımyn. Degenmen, biz 100 paıyz kinálimiz deı almaımyn. Búgingi tańda bizde bekitilgen keste bar, soǵan súıensek, barlyq 23 vagon qalaǵa naýryz aıynda ǵana keledi. Bir tramvaı jolda kele jatyr, jyl sońyna deıin úsh, qańtarda eki vagon jiberip, keıin alty-altydan toptap attandyramyz».
Oleg Bytsko atap ótkendeı, eger tramvaı basqarmasy tarapynan aıyppul sanktsııalary taǵylsa, belarýstik kásiporyn ony óteýge daıyn.
Al, Pavlodarǵa ótken aptada jetkizilgen eki vagon mereke kúnderinen keıin jolǵa shyǵady.
Aıta keteıik, bul vagondardy tekseristen ótkizip, jergilikti mamandardy úıretý úshin qalaǵa alty shet el mamany kelgen. Suhbat sońynda «Belkommýnmash» ýnıtarly kásiporynnyń dırektory qazaqstandyqtardy Táýelsizdik kúnimen quttyqtap, ekeýara jumystardyń osymen toqtap qalmaıtynyna senim bildirdi.
