Mınskiden kelgen jolaýshylar PTR-test tapsyrýǵa nege qarsy boldy
«Mınskiden ushyp kelgen erli-zaıyptylar karantındik statsıonarda COVID-19 PTR-test tapsyrýdan bas tartty jáne ashtyq jarııalady. Olar karantındik statsıonarda bir táýlikten astam ýaqyt boldy jáne túnde PTR-test tapsyrdy. Osylaısha búgin tańerteń PTR-testtiń teris nátıjesi rastalyp, erli-zaıyptylar úıine jiberildi», - dep jaýap berdi Sádýaqas Baıǵabylov QazAqparat tilshisine.
Onyń aıtýynsha, erli-zaıyptylarǵa esh ákimshilik jaza qoldanylǵan joq.
«Degenmen, karantındik stantsıonarda PTR-test tapsyrýdan bas tartý úshin aıyppul túrinde ákimshilik jaza kózdelgen. Jáne aıyppul salynǵannan keıin de jolaýshy PTR-test tapsyrýǵa mindetti bolady», - dep túsindirdi S. Baıǵabylov.
Sonymen birge, QR DSM Taýarlar men kórsetiletin qyzmetterdiń sapasyn baqylaý komıteti de túsinispeýshilik bolǵanyn aıtty.
«Bul adamdar – QR azamattary, Nur-Sultan qalasynyń turǵyndary. Ýkraınada demalyp, elge kelgen. Qarsylyqtyń basty sebebi – olarda IFA-test nátıjesi bolǵan. Bul degenimiz – bes-aq mınýtta saýsaqtan qan alyp, buryn aýyryp, aýyrmaǵanyńdy, antıdeneniń bar-joǵyn ǵana kórsetetin test. Ony esh jerde esepke almaıdy. Mundaǵy eń dáleldengen ádis – PTR testileý. Bas sanıtardyń qaýlysy boıynsha bizde tek PTR testileý nátıjesi bolýy kerek. Sol úshin túsinispeýshilik týyndaǵan. Keshe reıs jolaýshylarynyń birinen KVI anyqtalǵanyn, aınalasyndaǵy jolaýshylardyń úı karantınine oqshaýlanǵanyn aıtyp túsindirgen soń ǵana, olar saǵat 23.00-de test tapsyrýǵa kelisim berdi. Tańǵy altyda test nátıjesi teris shyqqandyqtan, úıine qaıtaryldy», - deıdi komıtettiń resmı ókili Erjan Baıtana.
Eske sala ketsek, 31 qazanǵa qaraǵan túni Mınskiden Nur-Sultanǵa kelgen eki áýe jolaýshysy PTR testileýden bas tartqan edi.
Taldaý nátıjeleri boıynsha reıstegi bir jolaýshydan KVI anyqtalyp, qalalyq juqpaly aýrýlar aýrýhanasyna jetkizildi. Laboratorlyq zertteýden ótken jáne KVI teris nátıjesin kórsetken basqa jolaýshylar úılerine jiberildi.