Mınskide TMD elderiniń SІM bas qosty
TMD syrtqy ister vedomstvolarynyń basshylary Dostastyq sheńberindegi qazirgi jaǵdaı men yqpaldastyqtyń perspektıvalaryn talqylap, halyqaralyq kún tártibiniń ózekti máseleleri boıynsha pikir almasty jáne Táýelsiz Memleketter Dostastyǵy qyzmetiniń tıimdiligin odan ári kóterý jónindegi suraqtardy qarastyrdy.
Q.Ábdirahmanov óziniń baıandamasynda Qazaqstan Dostastyq qurylǵannan beri oǵan belsendi qatysyp kele jatqandyǵyn jáne ony ártarapty yntymaqtastyqtyń biregeı jáne ámbebap alańy retinde qaraıtyndyǵyn atap ótti. Osyǵan baılanysty ol Prezıdent Nursultan Nazarbaevtyń TMD damýynyń qazirgi kontseptsııasyn revızııa jasaý jáne sol kontseptsııanyń erejelerin zamanaýı jaǵdaılarǵa beıimdeý qajettigi jónindegi bastamasyna aıryqsha nazar aýdardy. Mınıstr Qazaqstannyń TMD-nyń qazirgi tóraǵasy Tájikstan belgilegen basym maqsattardy qoldaıtyndyǵyn jáne olardy tabysty júzege asyrý úshin jan-jaqty qolǵabys kórsetýge daıyn ekendigin málimdedi.
Qazaqstan tarapy óziniń BUU-daǵy tóraǵalyǵynyń nátıjeleri jóninde habarlap, Prezıdent N.Nazarbaevtyń tóraǵalyǵymen ótken BUU QK-niń «Jappaı qyryp joıý qarýyn taratpaý: senim sharalary» taqyrybyndaǵy brıfıngisiniń mańyzdy qorytyndylaryna toqtaldy. Sonymen qatar, TMD delegatsııalarynyń basshylary Aýǵanstanda jáne Ortalyq Azııada aımaqtyq seriktestik ornatýǵa arnalǵan mınıstrler pikirtalastarynyń qorytyndylarymen tanystyryldy.
Mınskidegi Syrtqy ister mınstrleriniń alqasynda qaýipsizdik salasyna qatysty qujattardyń jobalary maquldandy. Atap aıtqanda, Aqparattyq tehnologııalar salasyndaǵy qylmystarmen kúres boıynsha yntymaqtastyq jónindegi kelisimniń jáne 2019 - 2023 jyldarǵa arnalǵan qylmyspen kúresý jónindegi birlesken sharalardyń memleketaralyq baǵdarlamasynyń jobalary bekitildi.
Sonymen qatar, Mınıstrler 2018 jylǵa arnalǵan TMD sheńberindegi syrtqy ister mınıstrlikteri arasyndaǵy kópdeńgeıli konsýltatsııalar josparyn bekitti. Bul qujatqa sáıkes aǵymdaǵy jylda halyqaralyq máseleler boıynshy on eki taqyryptyq konsýltatsııalar kózdelgen. Atap aıtqanda, ol TMD-ǵa qatysýshy elderdiń BUU, EYQU jáne basqa da halyqaralyq birlestikter sheńberindegi yqpaldastyǵy, jańa syn-tegeýrinderge jáne qaýip-qaterlerge tótep berý máseleleri, qarýsyzdandyrý salasyndaǵy yntymaqtastyq jáne t.b. qamtıdy.
Іs-shara barysynda delegatsııa basshylarynyń Belarýs Respýblıkasynyń Prezıdenti Aleksandr Lýkashenkomen kezdesýi boldy.
Mınıstrler keńesiniń aıasynda Q.Ábdirahmanov Ázerbaıjan jáne Túrikmenstan resmı delegatsııalarynyń basshylary Halaf Halafov jáne Serdar Berdimuhamedovpen ekijaqty kezdesýler ótkizdi. Kelissózder barysynda taraptar saýda-ekonomıkalyq jáne mádenı-gýmanıtarlyq salalardaǵy ekijaqty yntymaqtastyqtyń damýynyń máselelerin qarastyryp, halyqaralyq jáne aımaqtyq kún tártibin, sonyń ishinde Besinshi Kaspıı sammıtiniń daıyndyq barysyn talqylady.
Taraptar memleketter arasyndaǵy ynytymaqtastyq barlyq deńgeıde joǵary yqpaldastyqpen damyp jatqanyn tilge tıek etti. Ásirese, 2017 jyly memleketter basshylarynyń kezdesýleri barysynda qol jetkizilgen kelisimder men ýaǵadalastyqtardyń júzege asyrylýyna erekshe kóńil bólindi.
Ázerbaıjan tarapymen Túrkitildes memleketterdiń yntymaqtastyq keńesi qyzmetinde oryn alyp otyrǵan kadrlyq máseleler talqylandy.
