Mınskide reseılik ushaq apatqa ushyrady
ASTANA. Qazannyń 27-si. QazAqparat - Dúısenbi kúni keshke Mınski túbinde apatqa ushyraǵan «S-Eır» áýe kompanııasynyń VAE-125-800 ushaǵynyń bes jolaýshysynyń denesi tabyldy.
Belarýs Respýblıkasynyń Tótenshe jaǵdaılar mınıstrliginiń aqparaty boıynsha, ushaq bortynda 3 jolaýshy jáne 3 ekıpaj múshesi bolǵan. Altynshy adamnyń taǵdyry ázirge belgisiz, dep habarlaıdy RBK agenttigi.
Budan burynǵy aqparattarda, BAE-125-800 ushaǵynyń bortynda 5 adam - úsh ekıpaj múshesi men eki jolaýshynyń bolǵany habarlanǵan bolatyn. Ol málimetti Reseıdiń Áýe kóligi federaldyq agenttiginiń resmı ókili Sergeı Izvolskıı habarlady. Onyń aıtýynsha, ushaq Mınsk áýejaıynan birneshe shaqyrym jerde tabyldy. Qazir oqıǵanyń mán-jaıy anyqtalýda, oqıǵa ornynda qutqarý qyzmetteri jumys istep jatyr.
Reseıdiń Vnýkovo áýejaıynan ushyp shyqqan áýe laıneri birinshi talpynystan qona almaı, «Mınsk-2» áýjaıynyń ústinen bir aınalyp, qaıta qonbaq bolǵan kezde, radardan joǵalyp ketken. Ázirge rastalmaǵan málimetter boıynsha, ushaq bortynda «S-Eır» kompanııasynyń bas dırektory Marat Romashkın bolýy múmkin.
Reseılik "S-Eır" áýe kompanııasy álemniń túrli áýejaılarynan bıznes-klastaǵy charterlik reıstermen aınalysady.
