Mınskide memqyzmetti damytý trendteri Astana haby platformasynda talqylandy

MINSK. QazAqparat - Mınsk qalasynda  Belarýs Respýblıkasy Prezıdenti janyndaǵy Basqarý akademııasy Astana haby jáne Eýropa Keńesimen birlesip uıymdastyrǵan «Memlekettik qyzmet: qazirgi jaǵdaıy jáne damý keleshegi» halyqaralyq konferentsııasy ótti, dep habarlaıdy QazAqparat.

Jıyrma elden kelgen qatysýshylar Habtyń paneldik sessııasynda Eýropa men Azııadaǵy úkimetterdiń tsıfrlyq transformatsııasy jáne memlekettik qyzmetshilerdi yntalandyrý, sondaı-aq memlekettik qyzmet ınstıtýttary damýy týraly pikir bólisip, tájirıbe almasty.

 Konferentsııanyń ashylýynda Belarýs Basqarý akademııasynyń rektory Gennadıı Palchık quttyqtaý sóz sóılep, aımaqtaǵy memlekettik qyzmetti damytý úshin osyndaı platformanyń mańyzdylyǵyn atap ótti.

 Astana habynyń basqarýshy komıtet tóraǵasy Álıhan Baımenov úkimetter tıimdiliginiń sheshýshi faktory - memlekettik qyzmet kórsetý sapasy, sondyqtan ony jetildirý barlyq elder úkimetteriniń kún tártibinde turǵanyn atap ótti. Baımenov memleketterdiń damý erekshelikterin eskermeı, qoldanatyn ámbebap modeldiń joq ekenin aıtty. Degenmen, úkimetter sheshim qabyldaýda jahandyq úderister men memleketter, sonyń ishinde Astana habyna qatysýshy elder tájirıbesin eskeretinin jetkizdi.

Hab sessııasy barysynda ár elden kelgen qatysýshylar tájirıbe almasýǵa, aımaqtaǵy memlekettik qyzmetti damytý perspektıvalaryn talqylaýǵa jáne ozyq tájirıbelermen tanysýǵa múmkindik aldy.

 Polsha memlekettik qyzmeti jetekshisi Dobroslav Dovıat-Ýrbanskıı memlekettik basqarý júıesindegi zańnamalyq protsesti uıymdastyrý jaıyn baıandap, ashyq konsýltatsııa júrgizetin, sondaı-aq sarapshylar pikirin aıqyndaýmen aınalysatyn qyzmetter erekshe oryn alatyndyǵyn atap ótti.

 Ýkraınanyń memlekettik qyzmet jónindegi Ulttyq agenttigi basshysynyń orynbasary Andreı Zabolotnyı óz elin mysalǵa keltire otyryp, memlekettik qyzmet júıesindegi úkimettiń tabysty bastamalaryna toqtalyp, jańa  zamanaýı synaqtar jaıynda sóz qozǵady. Eńbekaqy júıesi týraly Belarýs Eńbek jáne Áleýmettik qorǵaý birinshi vıtse-mınıstri Andreı Lobovıch óz oıyn ortaǵa salsa, Habtyń Konsýltatıvtik Keńes múshesi Panos Lıverakos osy baǵytta aımaq memleketteri boıynsha salystyrmaly sholý jasady.

 Belgııanyń memlekettik qyzmetshilerdi olardyń biliktiligin baǵalaý negizinde irikteý tájirıbesimen Belgııa Koroldiginiń Federaldy memlekettik qyzmetiniń (BOSA) qoǵammen baılanys jónindegi menedjeri Ketlın Vermeıra tanystyrdy. Elektrondyq úkimet jáne elektrondyq qoǵam taqyryby Estonııanyń elektrondyq úkimet salasyndaǵy jetekshi sarapshysy Vırgo Rıasappıdiń baıandamasynda qozǵaldy.

 Ázerbaıjan, Belarýs, Grýzııa, Qazaqstan jáne Qyrǵyzstan ókiletti memlekettik organdar ókilderi men sarapshylary memlekettik qyzmet salasyn damytý týraly óz tájirıbelerimen bólisti.

 Konferentsııaǵa memlekettik organdar men halyqaralyq uıymdardyń basshylary men ókilderi, Eýropa men Azııanyń 20 elinen sarapshylar men ǵalymdar qatysty, olardyń 11-i - Astana habynyń qatysýshy elderi.