Mınskide maska taǵyp júrý mindetteldi
MINSK. BELTA – QazAqparat – Belarýs astanasy Mınskide maska taǵyp júrý tártibi engizildi, dep habarlaıdy QazAqparat BELTA agenttigine silteme jasap.
Búgin Mınski qalalyq atqarýshy komıtetiniń otyrysynda jedel respıratorly vırýsty ınfektsııa men koronavırýstyń aldyn alý sharalary bekitilgen №1069 sheshimge ózgerister engizildi.
«Adamdar jumys ornynda ǵana emes, astanadaǵy kez kelgen mekemege barǵanda maska taǵyp júrýi mindetti. «Sondaı-aq, avtobýs, metro, taksı syndy qoǵamdyq kóliktiń bárinde maska taǵyp otyrý qajet», - dep tolyqtyrdy astana merııasy.
Búginnen bastap qalada COVID-19 ben vırýstyq ınfektsııalardyń aldyn alý talaptaryn qadaǵalaý kúsheıtiledi. Jekemenshik nysandarynyń kez kelgen túriniń jetekshileri sanıtarııa-epıdemıologııalyq talaptardyń oryndalýyna barlyq jaǵdaıdy jasaýǵa mindetti.
