Mınskide lańkestik áreket boldy
SK. 12 sáýir. QazAqparat /Aıtýar Mamlın/ - Keshe, 11 sáýir kúni jergilikti ýaqyt boıynsha 17.55-te Mınskidegi «Oktıabrskaıa» metropolıten stansasynda jarylys boldy.
Bomba adamdar kóp júretin kezde jáne Mınsk metropolıtenindegi jolaýshylar aýysyp otyratyn jalǵyz bekette - «Oktıabrskaıa» jáne «Kýpalovskaıa» stansalarynda eki poıyz turǵan kezde jarylǵan.
Kýágerlerdiń aıtýynsha, platformada aldymen qatty tars etken dybys estilgen, odan keıin qara tútin shyqqan, oqıǵa ornyna dereý órt sóndirýshiler, 30 shaqty jedel járdem kóligi, mılıtsııa qyzmtkerleri jetken.
Jergilikti ýaqyt 21.35-tegi jaǵdaı boıynsha, jarylys saldarynan 11 adam qaza bolǵan, 100-den astam adam jaralanǵan. 35 zardap shegýshige oqıǵa ornynda medıtsınalyq kómek kórsetilse, 50-den astam adam Mınsk aýrýhanalaryna, negizinen 2-shi jáne 3-shi klınıkalyq aýrýhanalarǵa jetkizilgen. Aýyr jaraqat alǵandar da bar.
Oqıǵaǵa baılanysty Belarýs Prezıdenti Aleksandr Lýkashenko shuǵyl keńes ótkizdi. Ol kóliktegi qaýipsizdik sharalaryn kúsheıtý, Mınskide kólik qozǵalysynyń úzdiksiz qozǵalysyn qamtamasyz etý, zardap shekkender men olardyń týystaryna qajetti barlyq medıtsınalyq kómekterdi kórsetý týraly tapsyrma berdi. Sodan keıin A.Lýkashenko oqıǵa ornyna baryp, jaǵdaıdy óz kózimen kórdi jáne gúl shoqtaryn qoıdy.
Quqyq qorǵaý organdary bul oqıǵany lańkestik áreket retinde qarastyryp otyr. Osyǵan oraı Belarýs Respýblıkasynyń Bas prokýratýrasy qylmystyq is qozǵady.
Aldyn ala málimetter boıynsha, zardap shekkenderdiń arasynda Qazaqstan azaattary joq.
