Mınskide Qazaqstan men Belarýs SІM arasynda saıası konsýltatsııalar ótti

ASTANA. QazAqparat - Qazaqstan Respýblıkasy Syrtqy ister mınıstriniń orynbasary Ǵalymjan Qoıshybaev Mınsk qalasynda Ornyqty damý maqsatyna jetý jóninde (ODM) BUU- nyń óńirlik forýmyna jáne Qazaqstan men Belarýs arasyndaǵy syrtqy saıası vedomstvolar saıası  konsýltatsııalarǵa qatysty. 

Bul týraly syrtqy saıası vedomostvonyń baspasóz  qyzmeti habarlady.

 Eýropa jáne Ortalyq Azııanyń 40 elinen joǵary deńgeıdegi delegatsııalar qatysqan Ornyqty damý forýmynyń ashylý saltanatynda BUU Bas hatshysynyń orynbasary Amına Mohammed jáne Belarýs Premer-Mınıstri Andreı Kobıakov sóz sóıledi.

Óz sózinde Ǵ. Qoıshybaev Qazaqstan ODM-ny júzege asyrýdyń eń belsendi jaqtaýshylarynyń biri bolyp tabylatyndyǵyn, sondaı-aq adam ómiriniń ekonomıkalyq, áleýmettik jáne ekologııalyq salalarda asa ózekti máselelerin ámbebap turǵydan sheshýdi kózdeıtin «Qazaqstan-2050» ulttyq strategııasy BUU basymdyqtaryna sáı ekendigin erekshe atap ótti.
 

Ornyqty damý máseleleri Qazaqstannyń BUU Qaýipsizdik Keńesine músheliginiń kún tártibinde mańyzdy oryn alady. Atap aıtqanda, Prezıdent Nursultan Nazarbaevtyń BUU Qaýipsizdik Keńesiniń múshe memleketterine «Qaýipsiz, ádil jáne órkendegen álem qurý úshin jahandyq áriptestikti nyǵaıtý jónindegi Qazaqstannyń tujyrymdamalyq kózqarasy» atty saıası úndeýinde Ortalyq Azııadaǵy beıbitshilik, qaýipsizdik pen damý arasyndaǵy birtutas baılanysqa erekshe kóńil bólingen. Osy rette Memleket basshysynyń Almatyda ODM-ny ımplementatsııalaý úshin járdemdesýge baǵyttalǵan aǵymdaǵy jyldyń sońyna deıin BUU habyn qurý jónindegi bastamasynyń iske asyrylýy BUU Qaýipsizdik Keńesindegi músheliktiń jarııalanǵan maqsatyn ilgeriletýge úles qosady.

Saıası konsýltatsııalarǵa Belarýs tarapynan Syrtqy ister mınıstriniń  birinshi orynbasary Andreı Evdochenko qatysyp, eki jaqty yntymaqtastyqtyń saıası jáne  ekonomıkalyq salalary boıynsha perspektıvalary talqylandy. EOE, TMD, UQShU jáne ShYU aıasyndaǵy ózekti máseleler boıynsha pikir almasý oryn aldy jáne  halyqaralyq arenada eki memleket arasyndaǵy, sonymen birge halyqaralyq uıymdardaǵy ózara  ıntegratsııalyq is-qımyl  yntymaqtastyǵy atap kórsetildi.

Taraptar dıplomatııalyq qarym-qatynastardyń ornatylǵanyna 25 jyl tolǵan kezeńde  bolǵan Prezıdent N. Nazarbaevtyń Belarýs Respýblıkasyna resmı saparynyń arnaıy saıası mańyzy bar ekeni erekshe atap ótti.