Mınskide erkin kúresten Aleksandr Medved júldesi úshin halyqaralyq týrnır ótip jatyr
ALMATY. 4 naýryz. QazAqparat /Erlik Erjanuly/ - Keshe Mınsk qalasynda erkin kúresten 3 dúrkin Olımpıada chempıony atanǵan Aleksandr Medvedtiń júldesi úshin halyqaralyq týrnır óz jalaýyn kóterdi.
Elimizdiń qurama komandasynyń bas bapkeri Altaı Tanabekov bul jarysta 14 balýanǵa úmit artyp otyr. Onda el namysyn 66 jáne 120 keli salmaqtarda bir-birden, 55, 74 jáne 96 keli salmaqtarda eki-ekiden, al 60 pen 84 keli salmaqtarda úsh sportshy qorǵaıdy. Olardyń arasynda 2010 jylǵy Qazaqstan chempıondary Dáýlet Nııazbekov (55 kg), Abylaı Teltaev (60 kg), Qanat Berdıev (84 kg), 2010 jylǵy Qazaqstan kýbogynyń jeńimpazdary Ǵabıt Tólepbaı (55 kg) pen Maqsat Daýylbaev (66 kg), 2010 jylǵy Azııa chempıonatynyń jáne Azııa oıyndarynyń qola júldegeri Dáýren Jumaǵazıev (60 kg), jasóspirimder arasyndaǵy 2009 jylǵy Azııa chempıony Saıatbek Oqasov, 2010 jylǵy Azııa chempıonatynyń kúmis júldegeri Semen Semenov (84 kg), Azııa chempıonatynyń eki júrkin qola júldegeri Dáýlet Shabanbaı (96 kg), 2010 jylǵy Azııa oıyndarynyń qola júldegeri Ermek Baıdýashev (84 kg), áskerı qyzmetkerler arasyndaǵy Álem chempıonatynyń kúmis júldegeri Seıfaddın Osmanov(74 kg), Álem chempıonatynyń qola júldegeri Abdýlhakım Shapıev (74 kg), 2008 jylǵy Olımpıada oıyndarynyń kúmis júldegeri Taımýraz Tıgıev (96 kg) pen qola júldeger Marıd Mýtalımov (120 kg) bar.
