Mınskide ótken saýda mıssııasy nátıjesinde 5 mln dollarlyq kelisimshart jasaldy
ASTANA. KAZINFORM – Mınskide ótken Qazaqstannyń saýda-ekonomıkalyq mıssııasy qorytyndysy boıynsha qazaqstandyq jáne belarýstik kompanııalar arasynda jalpy quny 5 mıllıon dollar bolatyn kelisimshartqa qol qoıyldy.
Bul qujat Ulttyq maıly daqyldar óńdeýshiler qaýymdastyǵy men Belarýstiń «Dary poleı plıýs» kompanııasy arasynda jasalyp, otandyq ónimdi satyp alýdy kózdeıdi.
Sonymen birge taraptar eki el arasyndaǵy saýda-ekonomıkalyq yntymaqtastyqty keńeıtýge baǵyttalǵan birqatar mańyzdy qujatqa qol qoıdy. Atap aıtqanda, QazTrade pen Belarýs Ulttyq ámbebap taýar bırjasy arasyndaǵy memorandým tájirıbe almasýǵa, qazaqstandyq kásiporyndardyń bırjalyq saýdaǵa qatysýyna jáne elektrondyq alańdardy damytýǵa múmkindik beredi. Óńirdegi eń iri spot alańy sanalatyn Belarýs bırjasynda jyl saıyn 500 myńnan astam operatsııa jasalyp, jalpy aınalym 4 mlrd dollardan asady.
Sondaı-aq QazTrade pen Belarýs Ulttyq marketıng ortalyǵy arasynda memorandým qabyldandy. Qujat analıtıkalyq derektermen almasýdy, ónimderdi ilgeriletýge qoldaý kórsetýdi, seriktester izdeýdi, bıznes-mıssııalar men oqytý baǵdarlamalaryn uıymdastyrýdy qamtıdy. Bul qazaqstandyq óndirýshilerdiń Belarýs naryǵyna shyǵýyn jeńildetedi jáne kompanııalar arasyndaǵy kooperatsııany júıeli etedi.
QazTrade bas dırektory Aıtmuhammed Aldajarov mıssııa nátıjeleri eki el arasyndaǵy saýda áleýetin kúsheıtetini jóninde atap ótti.
«Qazaqstan men Belarýs kooperatsııada úlken áleýetke ıe. Taraptar jetkizilimderdi keńeıtýge, jańa naryqtardy ıgerýge jáne bıznestiń ózara is-qımylyn nyǵaıtýǵa múddeli», – dedi ol.
Kelissózderdiń jeke bóligi ónerkásiptik kooperatsııa máselelerine arnaldy. Qazirgi ýaqytta traktorlar, aýyl sharýashylyǵy tehnıkasy, avtotehnıka jáne lıftter óndirisin qamtıtyn 11 birlesken joba júzege asyrylýda. Mınskidegi kezdesýde karerlik samosvaldardy jınaý, qurylys salasyndaǵy kooperatsııany damytý jáne aýyl sharýashylyǵy kesheninde taýarlyq-súttik fermalar qurý baǵyttary talqylandy.
Saýda mıssııasy barysynda bıznes ókilderi birneshe qosymsha kelisimderge de qol jetkizdi. «AstanaInjKomStroı» kompanııasy «Izokom Plast» kásipornymen Qazaqstanda armırlengen qubyrlar óndirý jáne ónim jetkizý týraly memorandým jasady. ARBA WINE belarýstik «Býlbash» zaýytymen qazaqstandyq sharap jetkizý týraly kelissózder júrgizip jatyr. Al Ulttyq maıly daqyldar óńdeýshiler qaýymdastyǵy 5 mln dollarlyq negizgi kelisimnen bólek, «PraımFortGrýpp» JShS-pen de yntymaqtastyq týraly memorandýmǵa qol qoıdy.
Aıta keteıik, buǵan deıin Belarýs elinde Qazaqstannyń saýda úıi ashylatyny habarlanǵan bolatyn.