Mınskide ótken EAEO keden qyzmetteri Birlesken alqasy otyrysynda qandaı sheshim qabyldandy
ASTANA. KAZINFORM – 1 naýryzda Mınsk qalasynda (Belarýs Respýblıkasy) Eýrazııalyq ekonomıkalyq odaqqa múshe memleketterdiń keden qyzmetteri Birikken alqasynyń (EAEO KQBA) 45-shi otyrysy ótti.
Otyrysqa Memlekettik kirister komıtetiniń tóraǵasy Jandos Dúısembıev qatysty. KQBA-da EAEO-ǵa múshe memleketterdiń keden organdarynyń kedendik ákimshilendirý máselelerinde tásilderdi birizdendirý úshin qajetti quqyq qoldaný praktıkasy qarastyryldy.
Taýarlardyń biryńǵaı synyptamasyn qamtamasyz etý maqsatynda otyrys qorytyndysy boıynsha Eýrazııalyq ekonomıkalyq odaqtyń Syrtqy ekonomıkalyq qyzmetiniń biryńǵaı taýar nomenklatýrasyna sáıkes jekelegen taýarlardy jikteý boıynsha birqatar sheshim qabyldandy. Sondaı-aq zııatkerlik menshik obektilerin kedendik tizilimderge engizý kezinde quqyq ıelenýshilerge jáne (nemese) olardyń ókilderine qoıylatyn talaptardy kúsheıtýge, keden organynyń deklaratsııada málimdelgen málimetterge ózgerister (tolyqtyrýlar) engizý týraly sheshim qabyldaý merzimin quqyqtyq retteýge qatysty másele talqylandy.
Sonymen qatar Eýrazııalyq ekonomıkalyq odaqqa múshe memleketterde taýarlar shyǵarylǵannan keıin kedendik baqylaýdy júzege asyrý úshin qajetti qujattardy qaǵaz jetkizgishte saqtaýǵa, sondaı-aq kedendik qundy baqylaý baǵyty boıynsha táýekelderdi basqarýdyń biryńǵaı tásilderin belgileý úshin salyqty kóp qajet etetin taýarlardyń tizbesin bekitýge qatysty máseleler qaraldy.
Otyrysqa Armenııa, Belarýs, Qyrǵyzstan jáne Reseı keden qyzmetiniń birinshi basshylary, sondaı-aq Eýrazııalyq ekonomıkalyq komıssııanyń ókilderi qatysty.
EAEO KQBA qyzmetiniń negizgi baǵyty – keden isi salasyndaǵy basym baǵyttardy aıqyndaý, keden zańnamasyn jaqyndastyrýǵa jáne úılestirýge járdemdesý, keden jáne basqa da múddeli ulttyq qyzmetter men memleket vedomstvolarynyń praktıkalyq ózara is-qımylyn úılestirý. Conymen qatar keden isi salasynda qabyldanǵan memleketaralyq jáne úkimetaralyq sheshimderdi iske asyrýǵa yqpal etý.
