Mınskide qazaqstandyq «aqyldy» jabdyqtar men robot júıeleri tanystyryldy

ASTANA. KAZINFORM — Qazaqstannyń «aqyldy» stanoktary men robottandyrylǵan júıeleri Mınskide ótken «INNOPROM» ónerkásip kórmesinde kórsetildi, dep habarlaıdy Úkimettiń baspasóz qyzmeti.

Mınskide ótken «INNOPROM.Belarýs» halyqaralyq kórmesi aıasynda qazaqstandyq kásiporyndar ónerkásipti tsıfrlandyrý salasyndaǵy ázirlemelerin usyndy.

Ulttyq pavılon platformasynda óndiriske jasandy ıntellekti engizgen otandyq kompanııalardyń sheshimderi kórsetildi. Eksponattar arasynda robottandyrylǵan júıeler men óndiristik protsesterdiń qaýipsizdigine arnalǵan «aqyldy» qurylǵylar bar. Bul jobalar Memleket basshysynyń jasandy ıntellektini ómirdiń barlyq salalaryna engizý jónindegi tapsyrmalary aıasynda júzege asyrylyp jatyr.

Mundaı tehnologııalardy engizýdiń mysaly retinde aýyl sharýashylyǵy tehnıkasy men jıyntyq bólshekterin shyǵaratyn «Qazaqstandyq agroınnovatsııalyq korporatsııasyn» aıtýǵa bolady. Kompanııa sandarmen basqarylatyn jabdyqqa kóshti. Endi mashınalar qolmen emes, tsıfrlyq baǵdarlamamen jumys isteıdi: ınjenerler bóliktiń 3D modelin jasap shyǵarǵan soń «aqyldy» stanok ony metaldan joǵary dáldikpen jonyp shyǵady. Bul tásil buryn shetelden satyp alynatyn kúrdeli komponentterdi shyǵarýǵa jáne óndiristegi lokalızatsııa deńgeıin 86%-ǵa deıin kóterýge múmkindik beredi.

Tsıfrlandyrý tek óndiristi ǵana emes, sonymen qatar qyzmet kórsetýdi de qamtıdy. Jańa jabdyq jahandyq tehnıkalyq qoldaý kórsetý jelilerine kiriktirilgen, bul qashyqtan dıagnostıka jasap, baǵdarlamany baptaýdy qamtamasyz etedi.

— Bizdiń óndiriske robottandyrylǵan keshender engizilgen, endi birtindep tsıfrlandyrýǵa kóshýdemiz. Jasandy ıntellektini qoldanyp, ony kúndelikti jumysqa kiriktirmekpiz, bul bizge damýǵa kómektesip, naqtylyqty, sapany jáne jyldamdyqty qamtamasyz etedi. Prezıdent eńbek ónimdiligin eki esege ulǵaıtýǵa basa mán berip otyr, al óndiristik qýatty kúsheıtip almaı bul múmkin emes. Osy maqsatta memleket mashına-traktor parkin jańartýǵa qomaqty qarajat bólýde. Endeshe naryqtaǵy suranysty tolyq qamtýǵa mindettimiz: naryq tıisti sapadaǵy ónimdi talap etedi, al biz ony qamtamasyz etýimiz kerek, — dep atap ótti korporatsııa dırektory Oleg Balybın.

Osyǵan deıin Premer-mınıstr Oljas Bektenov Mınskide «INNOPROM.Belarýs» halyqaralyq ónerkásip kórmesine aralap, «Jańa tehnologııalar odaǵy: bolashaq ónerkásipti qurý» taqyrybyndaǵy plenarlyq sessııada sóz sóılegen edi.