Mınskide aty ańyzǵa aınalǵan «Dos-Muqasan» ansambli týraly fılmniń tusaýkeseri ótti

ASTANA. KAZINFORM — Mınsk halyqaralyq «Listapad» kınofestıvalinde «Dos-Muqasan» fılmi kórsetildi. Vokaldy-aspaptyq ansambl týraly týyndy Qazaqstan kınosy kúni aıasynda usynyldy, dep habarlaıdy BELTA.

Fılm «Pobeda» kınoteatrynda kórsetildi.

Qazaqstannyń Belarýstegi elshiliginiń keńesshisi Rashıd Ǵazızov fılm Efrat Sháripovtyń stsenarıi boıynsha QR Mádenıet jáne aqparat mınıstrligi men Ulttyq kınematografııany qoldaý memlekettik ortalyǵynyń yqpalymen túsirilgenin habarlady.

Rashıd Ǵazızov kınotýyndy týraly qysqasha baıandap, kópshiliktiń nazaryna usyndy. 

Shynaıy oqıǵalarǵa negizdelgen mýzykalyq drama polıtehnıkalyq ınstıtýt stýdentteriniń Almatyda ansambl qurý tarıhyn baıandaıdy. Fılm jas mýzykanttardyń alǵashqy tabystarynan bastap kedergilerge, akademııalyq qıyndyqtarǵa jáne ǵylymdaǵy mansap pen óner arasyndaǵy tańdaýǵa deıingi qıyn jolyn sıpattaıdy.

Rashıd Ǵazızovtyń aıtýynsha, fılmde keıipkerlerdiń shynaıylyǵyna erekshe mán berilgen. Ansambldiń naǵyz múshelerine sáıkes keletin akterlik quram muqııat tańdaldy. Tarıhı jáne mýzykalyq shynaıylyqty qamtamasyz etý úshin ansambldiń negizin qalaýshylar Murat Qusaıynov pen Dosym Súleev fılmdi túsirýge kómektesý úshin keńesshi retinde tartyldy.

Rashıd Ǵazızov fılmniń mańyzdy elementi 1973 jyly maýsymda Mınskide ótken estradalyq án oryndaýshylar men vokaldy-aspaptyq ansamblderdiń Búkilodaqtyq baıqaýy týraly estelik ekenin atap ótti. Qatysýshylar bul baıqaýda júldege talasqan. Jeńimpazdar Berlınde ótken 10-shy Dúnıejúzilik stýdentter men jastar festıvalinde óner kórsetýge múmkindik aldy. Bul sát fılmde de beınelengen. Sonymen qatar týyndyda «Dos-Muqasan» ansambliniń sol kezde úlken sahnaǵa endi ǵana qadam basqan «Pesnıary» tobymen kezdesýi beınelengen.

Dos-Muqasannyń sahnada óner kórsetip júrgenine 50 jyldan asty. Ansambldiń birinshi jetekshisi 2023 jyly dúnıeden ótti.

Ǵazızov «Listapad» sııaqty festıvalderdiń TMD elderi men búkil álem úshin mańyzdylyǵyn atap ótti. Olar halyqty biriktirýge, mádenıetterdi jaqsyraq túsinýge jáne halyqaralyq baılanystardy damytýǵa kómektesedi.

Aıta keteıik, 31 qazan men 7 qarasha aralyǵynda «Kózqarastardy ózgertetin tarıh» uranymen 31-shi Mınsk halyqaralyq «Listapad» kınofestıvali ótip jatyr. Bıyl festıvalge 120 elden 3600-den astam ótinim kelip tústi. Baǵdarlamaǵa 41 elden 157 fılm irikteldi. Festıvalde Reseı, Qytaı, Úndistan, Iran, Pákistan jáne Eýropa elderiniń kınematografısteriniń jumystary kórsetildi.

Eske salaıyq, Qazaqstan Ázerbaıjanda «Dos-Muqasan» fılmin tanystyrdy.