Mınsk úderisin ilgeri jyljytýǵa Elbasy N. Nazarbaevtyń qosqan úlesi zor boldy - SІM

ASTANA. QazAqparat - Naqty túrde alǵanda «mınsk úderisin» alǵa jyljytýǵa QR Prezıdenti Nursultan Nazarbaevtyń qańtardaǵy jeke bastamalary nátıjesinde jol ashyldy. Búgin Májilistegi Úkimet saǵatynda QR Syrtqy ister mınıstri Erlan Ydyrysov osylaı málim etti.

Syrtqy saıasat basshysy sóz arasynda Mınskide byltyrǵy jyldyń tamyz aıynda EAEO úshtigi, Eýropalyq odaq pen Ýkraına basshysy arasynda alǵashqy kezdesý ótkenin, bul kezdesý 5 jáne 19 qyrkúıekte Mınsk kelisimine qol qoıýǵa negiz bolǵanyn atap ótti. «Áıtse de, urysty toqtatýǵa baǵyttalǵan ol kelisim saqtalǵan joq. Sonyń saldarynan jeltoqsan-qańtar aralyǵynda kúsh qoldaný kúrt artyp, mınsk kelisimi oryndalmaıtyn deńgeıge jetti. Osyǵan baılanysty Elbasy N. Nazarbaev jeltoqsan aıynda beıbitshiliktiń saqtalýyna qatysty belsendi áreketterge bardy. Prezıdent aldymen Mınskige, sosyn birden Máskeýge bardy, budan soń Frantsııa prezıdenti Ollandtyń elimizge sapary barysynda, kúni boıy Ýkraınadaǵy daǵdarys týraly áńgime órbidi. Odan keıingi kezde Olland myrzanyń Qazaqstannan shyǵyp, Máskeýge josparlanbaǵan aıaldamasy da bárine belgili. Al qańtar aıy boıy biz «normand tórttiginiń» kezdesýin kúttik, aldymen bul Astanada ótedi delingen. Alaıda qısyndy sebepterge baılanysty ol elimizde bolǵan joq», - dep túsindirdi SІM E. Ydyrysov.

Onyń aıtýynsha, Ýkraına daǵdarysy tóńiregindegi Elbasy N. Nazarbaevtyń Germanııa Kantslerimen, Ýkraına jáne Reseı Prezıdentterimen áńgimesi nátıjeli boldy, sonymen qatar, Qazaqstan Ýkraına ahýalyn retteý úderisinde mańyzdy ról atqardy. «Degenmen, Ýkraına áli de daǵdarystan arylǵan joq, jaǵdaı kúrdeli. Qaqtyǵystarǵa qatysyp otyrǵan memleketter arasyndaǵy qaıshylyqtar ustanymyna qaramastan daǵdarystan shyǵý joldary da joq emes», - dedi SІM.