Mınsk metrosynda bolǵan lańkestik árekettiń saldarynan qaza bolǵandar men zardap shekkenderdiń arasynda Qazaqstan azamattary joq - QR elshiligi
SK. 12 sáýir. QazAqparat /Aıtýar Mamlın/ - QazAqparat buǵan deıin habarlaǵandaı, keshe, 11 sáýir kúni keshke Mınski metropolıteniniń «Oktıabrskaıa» stansasynda jarylys boldy.
Kýágerlerdiń aıtýynsha, platformada aldymen tars etken dybys shyqqan, artynda qalyń tútin jaıylǵan.
Jarylys saldarynan 11 adam qaza bolyp, 100-den astam adam jaralanǵan.
Qazaqstannyń Belarýs Respýblıkasyndaǵy elshiliginen habarlaǵandaı, aldyn ala málimetter boıynsha (jergilikti ýaqyt 23.00 jaǵdaı boıynsha), jarylysta bizdiń otandastarymyzdyń zardap shekkeni týraly ázirge eshqandaı málimet joq. Dıplomatııalyq ókildiktiń qyzmetkerleri Belarýs ókimetimen turaqty baılanysta bolyp, oqıǵanyń barysyn jiti qadaǵalaýda jáne olardyń quzyryndaǵy barlyq málimetterdi tekserýde.
