Mınsk halqy Pavel Sheremetti aqtyq saparǵa shyǵaryp saldy
ASTANA. QazAqparat - Mınskide Ýkraına astanasynda qaza tapqan jýrnalıst Pavel Sheremetpen qoshtasý rásimi ótip jatyr, dep jazady TASS.
Sheremetpen qoshtasýǵa jergilikti jýrnalıster, saıasatkerler, qoǵam qaıratkerleri jáne Mınsk turǵyndary keldi. Sonymen qatar, ýkraınalyq jýrnalıster men ÝR Joǵarǵy Rada depýtattary da qatysty.
Qoshtasý rásimi Astana ýaqytymen 17:00-ge deıin jalǵasady. Sodan keıin máıit Mınsk túbindegi Soltústik zıratqa, ákesiniń janyna jerlenedi.
20 shilde kúni Kıevte tań mezgilinde jýrnalıst Pavel Sheremet óltirildi. Ol mingen kólikke jarylǵysh zat ornatylǵan. Polıtsııa jýrnalıstiń ólimine qatysty qasaqana kisi óltirý degen málimdeme jasady.
Sheremet 1971 jyly 28 qarashada Mınsk qalasynda dúnıege kelgen. 1998 jyly ORT arnasyndaǵy «Jańalyqtar» baǵdarlamasynyń arnaıy tilshisi bolyp jumys istedi. 1999 jyldyń qańtar aıynda telearnanyń aqparattyq baǵdarlamalar dırektsııasynda reseılik jáne sheteldik korrespondenttik jelisiniń shef-redaktory atandy. «Vremıa» aptalyq saraptamalyq baǵdarlamasynyń júrgizýshisi boldy. 2009 jyldan beri «Ogonek» jýrnaly saıasat jáne qoǵam bóliminiń redaktory boldy.
Keıinirek, Reseı qoǵamdyq televızııasynda jumys istedi. 2010 jyly Sheremettiń Reseı azamattyǵyn alýyna baılanysty, Belarýs ony azamattyǵynan aıyrdy. Sońǵy 5 jyl boıy Kıevte turyp keldi. 2012 jyldan bastap, «Ýkraınskaıa pravdamen» birge jumys isteı bastady. Al 2015 jyldyń qyrkúıeginen bastap, «Radıo Vestıde» avtorlyq baǵdarlamasyn júrgizdi.
