Mınsk Bakıevti ustap bermeıdi - Lýkashenko
ASTANA. Mamyrdyń 5-i. QazAqparat - Mınsk, Qyrǵyzstan tarapynan sáıkes ótinish túsken jaǵdaıdyń ózinde, eks-prezıdent Qurmanbek Bakıevti ekstradıtsııalaýdan bas tartady, dep málim etti Belarýs eliniń basshysy Aleksandr Lýkashenko «Reıter» agenttigine bergen suhbatynda.
Lýkashenkonyń aıtýynsha, mundaı áreket Qyrǵyzstannyń ýaqytsha úkimeti úshin nátıjesiz áreket bolyp tabylady. «Bakıev Belarýs memleketiniń jáne prezıdentiniń qorǵaýynda», dep málim etti Lýkashenko.
Buǵan deıin Qyrǵyzstannyń ýaqytsha úkimeti arnaıy dekretpen Bas Prokýratýraǵa prezıdenttik taǵynan taıdyrylǵan Qurmanbek Bakıevty eline ekstradıtsııalap, ony qylmystyq jazaǵa tartýdy tapsyrǵan bolatyn. Osy dekretpen Q.Bakıev «beıbit adamdardy atý týraly sheshim qabyldaǵany úshin» eks-prezıdent jáne derbes quqyqtylyǵy mártebesinen aıyrylǵan edi.
Esterińizge sala keteıik, sondaı-aq, Qyrǵyzstannyń ýaqytsha úkimeti sáýirdiń 7-si kúni kóptegen adam óltirilgen buqaralyq tártipsizdikterge kinálilerdi tapqan adamǵa aqshalaı syıaqy taǵaıyndady. Oǵan burynǵy prezıdent Q.Bakıev, onyń inisi Janyshbek (Janysh) jáne onyń uldary Maksım, Marat Bakıevter kináli dep tabylyp otyr.
Sáýirdiń 7-i kúni oppozıtsııa lıderleri men bılik arasyndaǵy qaqtyǵystan keıin Qyrǵyzstandaǵy oppozıtsııa jaqtastary QR-nyń Úkimet úıin basyp alyp, bılik ýaqytsha úkimetke ótti. Prezıdent Qurmanbek Bakıev eldi tastap, ókilettiligin doǵarý týraly ótinish jazǵan. Qyrǵyzstandyq aq úıdiń tolqýynan birneshe ondaǵan adam qaza taýyp, 1,5 myńy jaraqattanǵan.
