Mınnesotada zańsyz mıgratsııaǵa qarsy operatsııa kezinde atys boldy
ASTANA. KAZINFORM — AQSh-tyń Mınnesota shtatynda federaldyq qyzmetterdiń zańsyz mıgratsııamen kúres operatsııasy barysynda atys bolyp, qarýly zańsyz mıgrant qaza tapty dep habarlaıdy Euronews.
AQSh Іshki qaýipsizdik mınıstrliginiń dereginshe, oqıǵa tańerteń Mınneapolıs qalasynda bolǵan. Shekaralyq patrýl qyzmetkerleri zorlyq-zombylyq jasaǵan qylmyskerdi ustaýǵa baǵyttalǵan arnaıy operatsııa júrgizgen kezde, er adam 9 mm kalıbrli jartylaı avtomatty tapanshamen qyzmetkerlerge jaqyndap, ustaý áreketine belsendi qarsylyq kórsetken. Ómirine qaýip tóngenin sezgen bir agent oq atqan. Zardap shekken adam medıtsınalyq kómek kórsetilgenine qaramastan sol jerde qaıtys boldy.
Mınıstrlik dereginshe, qaza tapqan adamnyń tapanshasy eki oq-dári salynǵan magazınmen birge bolǵan jáne jeke kýálikteri bolmaǵan. Oqıǵa ornyna shamamen 200 adam jınalyp, tártip saqshylarynyń jumysyn qıyndatqan. Qaýipsizdikti qamtamasyz etý úshin baqylaý sharalary qoldanyldy.
Mınnesota gýbernatory Tım Ýolz federaldyq agentterdiń áreketterin qatty synǵa alyp, shtatta júrgizilip jatqan ımmıgratsııalyq operatsııalar barysynda «taǵy bir qaıǵyly atys» bolǵanyn málimdedi.
Oqıǵa AQSh prezıdenti Donald Tramp ákimshiliginiń mıgratsııalyq saıasatyna qarsy Mınneapolıste ótken aýqymdy narazylyqtar tusynda boldy. Kúnniń sýyq bolýyna qaramastan, myńdaǵan adam ótken kúni ımmıgratsııalyq qyzmet Ekvadordan kelgen bes jastaǵy bala men onyń ákesin ustaǵannan keıin kóshege shyqty. Jergilikti bılik málimetinshe, bala otbasymen turǵan úıiniń janynda ustalǵan.
AQSh vıtse-prezıdenti Djeı Dı Vens balanyń ustalǵanyn rastady jáne qyzmetkerlerdiń áreketi onyń qaýipsizdigi úshin jasalǵanyn aıtty. Al BUU Bas adam quqyǵy komıssary Folker Tıýrk AQSh bıligin mıgranttar men bosqyndarǵa zııan keltiretin tájirıbeni toqtatýǵa shaqyrdy.
Budan buryn AQSh Memlekettik departamenti 75 eldiń azamattary úshin ımmıgratsııalyq vızanyń toqtatylýyn túsindirdi.