Myńnan astam teńiz jaıaý áskeri 10 shaqyrymǵa júgirdi
ASTANA. KAZINFORM – Teńiz jaıaý áskerleri brıgadasynyń áskerı qyzmetshileri tól merekelerine oraı uıymshyldyq pen tózimdilikti pash etken patrıottyq aktsııa uıymdastyrdy.
Júgirý bastalar aldynda brıgada komandıri gvardııa podpolkovnıgi Azamat Súleımenov jeke quramǵa bastamalary úshin alǵys aıtyp, kásibı merekesimen quttyqtady.
Bólimsheler júgiriske ásker tekteriniń týlaryn kóterip shyqty. Qorǵanys mınıstrligi málimetinshe, teńiz jaıaý áskerleriniń legi 10 shaqyrymdyq qashyqtyqty senimdi eńserip, joǵary dene daıyndyǵy men uıymshyldyq kórsete aldy.
Bárinen buryn 4 jastaǵy Bek Álıuly kórermen nazaryn ózine aýdardy. Jýyrda ǵana teńiz jaıaý áskeri qataryna sımvolıkalyq qabyldaý rásiminen ótken ol áskerı qyzmetshilermen birge júgirýge qatysty. Jas patrıot qashyqtyqtyń edáýir bóligin ózdiginen júgirip ótti.
Ofıtserler men serjanttar oǵan qoldaý kórsetip, jigerlendirip otyrdy. Al eń qıyn tustarda ony kóterip alyp júrdi. Bektiń tózimdiligi, tabandylyǵy jáne teńiz jaıaý áskerlerimen birge qashyqtyqty tolyq ótýge degen shynaıy talpynysy urpaqtar sabaqtastyǵynyń, birlik pen jaýyngerlik baýyrlastyq dástúrlerine adaldyqtyń jarqyn sımvolyna aınaldy.
Aıta keteıik, Frantsııany azat etýge qatysqan qazaqstandyq jaýyngerlerdiń týystary marapattaldy.
