Myńnan astam balanyń kindik sheshesimin – akýsher
QYZYLORDA. KAZINFORM – Merekelik keıipkerimiz Klara Sársenova – 1991 jyldan beri Qyzylorda oblysy Qarmaqshy aýdandyq aýrýhanasyna qarasty perzenthana bóliminiń akýsheri. Bıyl osy salada taban aýdarmaı eńbek etip júrgenine qyryq ekinshi jyl.
Ol 1965 jyly Qarmaqshynyń Aqjar aýylynda dúnıege kelgen. 1980-1984 jyldar aralyǵynda Qyzylorda medıtsına kolledjinde oqydy. Ony úzdik dıplommen bitirgen soń joldamamen týǵan jerge oraldy. Kazinform tilshisimen suhbatta keıipkerimiz aýyl akýsheri bolǵan ýaqyttaǵy qyzyǵy men qıyndyǵy mol kúderdi eske aldy.
Jedel járdem kóliginiń tapshylyǵynan fermalardy jaıaý aralaýǵa týra kelgen. Bosanýshylardyń kóptiginen olarǵa kúnimen-túnimen tabanynan tik turyp qyzmet kórsetti. 1989 jyly otbasylyq jaǵdaıyna baılanysty aýdandyq aýrýhanaǵa aýysty. Odan keıin aýrýhananyń perzenthana bólimine jumysqa ornalasty.
- Bala kezimde «kindik sheshe» degen uǵymǵa qatty qyzyqtym. Іnimniń kindigin aýdanymyzdyń bilikti azamaty Qońyrbaı Dáýmenov aǵanyń anasy kesken bolatyn. Ol kisi úıge kelgen saıyn baýyryma táttiler ákelip beredi. Soǵan qyzyǵyp, armandadym. Mamandyq tańdaýyma osy jaǵdaı sebepshi boldy dep oılaımyn. Ózim qyryq jyldan astam ýaqyt ishinde qanshama balaǵa kindik sheshe boldym. Eseptep kórsem, sanynan jańylysamyn. Bosaný zalynda járdemim tıgen analardyń kóbi kórgen jerde tanyp, izet bildirip jatady. Kóshede toqtatyp, «Klara apa, qyzyńyz ózińiz sııaqty pysyq nemese ulyńyz óte jaqsy oqıdy» degende kóńilim kóterilip qalady. Biz úshin budan artyq baǵa joq, - dedi Klara Sársenova.
Keıipkerimiz jubaıy Muhtar Jubanbaevpen birge eki ul ósirip, qatarǵa qosty. Búginde olardan taraǵan nemerelerdiń aıaýly ájesi. Al jumys barysynda ózi kómek qolyn sozyp, jaryq dúnıege kelýine sebepker bolǵan balalardyń sany myńnan asyp jyǵylady. Akýsher – balaǵa ómir, anaǵa baqyt syılaıtyn mamandyq. Ol muny jan-dúnıesimen sezinedi.
- Aýyldyq jerde akýsher jalǵyz bolǵandyqtan jas analar arasynda aýdan ortalyǵyna jete almaı, úıde bosanǵan jaǵdaılarda kezdesti. Sondaı bir jaǵdaı esime túsip otyr. Oqýdy jańa bitirip, jumysqa ornalasqan kezim. Umytpasam, 1984 jyldyń 6 naýryzy bolý kerek, ol ýaqytta ÝZI degen joq, aıaǵy aýyr kelinshek oıda joqta tolǵaq bastalyp, egiz bosandy. Allanyń qalaýymen ana da, uly men qyzy da aman. Kazirgi kúni perzenthananyń bosaný zaldarynda áıelderge tabıǵı jolmen bosaný úshin úıdegideı jaǵdaı jasalǵan. Seriktestiń qatysýymen ártúrli qımylda, ózi qalaǵandaı bosanýǵa múmkindik bar, - dedi tájirıbeli akýsher.
Eldiń alǵysyna bólengen eleýli mamandyq ıesi marapattan quralaqan emes. Sonyń biri - «Densaýlyq saqtaý isine qosqan úlesi úshin» medali ótken jyly keýdesinde jarqyrady.
- Deni saý anadan deni saý sábı dúnıege keledi. Deni saý urpaq – elimizdiń bolashaǵy. Sondyqtan sportpen shuǵyldanyp, durys tamaqtaný, zııandy ádetterden aýlaq bolyp, kúndelikti jattyǵý jasaýdy ádetke aınaldyrý kerek, - dedi Klara Sársenova.
Ótken jylǵy málimetke súıensek, Qazaqstanda 9 myńnan astam akýsher eńbek etedi, olardyń 64%-y qalada, 36%-y aýylda jumys isteıdi.